90 -jyldardyń bas kezi. Qoly kús-kús, tilim-tilim bolyp kúnge kúıgen kelinshektiń óksip jylap kele jatqanyna da eki saǵattaı boldy. "Qudaı jazańdy bersin seniń" dep bireýdi kúbirlep qarǵap keledi. Kóleńkesi joq jazyq dalada bir jutym sýǵa zar bolyp, keýip qalǵan jutqynshaǵy búlkildep qoıa berdi. Bul kúndi Gúlnár eshqashan umytpas. Besikte jatqan qundaqtaýly sábıin esine túsirgende omyraýynan súti aǵyp ketkenin baıqamaı qaldy. "Botam-aý, botam, keshirshi meni" ,- dedi egilip. Barlyǵynan úıdegi shıetteı balalarynyń qazir qolyna qarap: "Anashym, ne alyp keldińiz?" degen jasaýraǵan janarynan qorqady. 
- E, Qudaıym-aı, ne isteımin, aıtyńyzshy?! - dedi de, qumǵa ekpetinen talyp qulady. Qansha jatqany belgisiz, bir kezde kúbirlegen adamdardyń daýysynan selt etip oıanyp ketti. Basyndaǵy oramaldy sheshti de, betin jýǵan jasyn súrte berdi. 
- Apajan, turyńyz, - degen er adamnyń daýysynan shoshyp ketken Gúlnár:
- Tıispeńiz, maǵan! - dedi aıqaılap.
Anadaı jerde turǵan jeńil kóliktiń ishinen bir top erkek saý etip tústi de:
- Ne bolǵan bul áıelge? - dedi qatqyl daýyspen.
- Bilmedim…Qatty shoshyńqyrap qalǵan-aý deımin, - dedi jas jigit áıeldiń júzine aıaýshylyqpen qarap. 
-Esi aýysqan qatyn shyǵar, - dedi kóliktiń janynda turǵan alyp deneli taqyrbas erkek mysqyldap. 
Aıaq-qoly dirildep, tisteri qalsh-qalsh etip, beti topyraq pen jastan aıǵyzdalyp, shashtary alba-julbasy shyqqan kelinshekti kórgen adam shynynda esi aýysqan dep oılar edi. Kólikten túsken shashy buıra-buıra jaýyryny qaqpaqtaı er kisi aıaǵyn alshań basyp, keıýananyń janyna keldi de:
- Apaı, turyńyz! Ne boldy aıta qoıyńyz? Jylamańyz, - dedi de, - qolyn sozdy. Toptasqan erkekterdi kórgen baıǵus áıel záresi zár túbine jetip turǵan edi. Sony baıqaǵan buıra shashty kisi:
- Sý ishesiz be, apaı? - dep jáımen surady. Áıel basyn ızeı berdi. Alpamsa deneli shashtary tikireıgen jigitter zyr júgirip máshıneden torsyqqa quıylǵan aǵarǵandy usyndy. Bir kese aırandy ashqaraqtana simirip iship jatqan áıeldi kórgen erkekter qatty músirkep qarady.
- Apaı, qoryqpańyz bizden. Ózińizbiz. Onan da bizge aıtyńyz, kimsiz? Nege jyladyńyz? Kim jylatty?
Áıel susty erkekterdiń jyly sóılegeninen be, álde, ishi tolyp ketkennen be, ańyrap jylap alpamsadaı erkektiń aıaǵyna jyǵyla ketti. Mundaıdy kútpegen buıra shashty kisi áıeldi jerden turǵyzyp:
- Apajan-aý, munyńyz ne? Turyńyz, - dedi de, jáımen qoltyǵynan demep, turǵyzdy. 
- Joldasym byltyr súzekten qaıtys boldy. İshimdegi sábıim men syrtymdaǵy tórt balamen jesir qaldym. Buryn kúıeýim bar kezde ashtyqtyń ne ekenin bilmegen edik. Úlken qyzymnyń jasy on beste. Sol qyzymdy balalarǵa bas-kóz etip qaldyramyn da mynaý jerdegi egistikte jaldanyp kúndik jumys isteımin. Qojaıynymyz jeti aǵaıyndy jigitter. Osy aýyldy ustap turǵandar. Barlyǵymyz qorqamyz. Biraq, jan saqtaý úshin solarǵa baryp jumys suraımyz. Kúnde tańerteń 5-ten bastap sol baıdyń gektarlap ekken egistigindegi alma, júzim baqtaryn baptaımyz. Bir jutym sý bermeıdi. Bir mezgil demala qoısaq, keıde uryp-soǵady. Balalarymnyń qý tamaǵy úshin barlyǵyna shydaýǵa barmyn. Quldyń ózin bulaı ustamaıtyn shyǵar. Aıaǵy aýyr kelinshek bar bolatyn, qatty sharshap otyra ketti de maǵan: "Sý ákelip berińizshi, aýa jetpeı jatyr", -dedi. Endi sý tolǵan bóshkege jete bergenimde, qojaıyn Nurlan:
- Eı, qatyn, bylaı tur! İshpeısiń! - dep aıqaılaı bastady. Shoshyp kettim. Qasyma ejireıip, kózi alaryp kele jatyr. Sosyn men: 
- Aınalaıyn-aý, biz óz jumysymyzdy jasap jatyrmyz ǵoı. Nege kóńiliń tolmaıdy? Tegin turǵan qara sýdy da aıaısyń ba? - degenim sol edi, shapalaqpen jaǵymnan salyp qaldy. Jerge jalp etip otyra kettim.
- Sen qatyn baıyńdy jutyp, beıshara bolǵanyńdy umytqan ekensiń. Kim saǵan jumys berip, nanyńdy jegizdirip otyrǵan, aıtshy?! - dedi. Mundaı qorlyqqa shydamaıtynymdy bilgen men:
- Ottama! Meniń kúıeýimniń árýaǵynan qoryqsań netti?! Qaıtar kesheden bergi kúndik aqshamdy!- dep edim, ol maǵan tylaǵyn shyǵaryp:
- Má, saǵan! - dep betime basty da, - joǵal kózimnen! Endi bul jerge kelýshi bolma! - dedi aıqaılap. Sodan tórt kılometr jerdi jaıaý júrip, bir jutym sýǵa zar bolyp jylap kele jatyp osy jerde es-túsimnen aıyrylyp qulap qalyppyn, - dep aıaqtady. 
Buıra shashty erkek: 
- Apaı, júrińiz, otyryńyz mashınaǵa! Ol ákeńniń aýyzyn…kórsetińiz! Ákesin tanymaı júr eken, kórseteıin! - dedi tistenip...
(jalǵasy bar)

Jazba Bıbigúl Dáýletbekqyzynyń Facebook paraqshasynan alyndy.