«Qazcontent» AQ qurylymyna kiretin Kaztube.kz beıne-portaly «Men – mobıldi (utqyr) reportermin» konkýrsyn jarıa etti, dep jazady Qamshy.kz aqparat agenttigi. Bas júlde – 200 myń teńge.

«Uıaly telefonǵa beıne (vıdeo) túsirgendi unatasyń ba? Qyzyqty oqıǵalardyń únemi bel ortasynda júresiń be? Seniń beıneńdi kópshilik kórgenin qalaısyń ba? Olaı bolsa, jyldyń basty konkýrsyna qatysýǵa degen óz múmkindigińdi jiberip alma. Kaztube.kz beıne-portaly «Men – mobıldi (utqyr) reportermin» atty aı saıynǵy tuńǵysh konkýrsyn jarıalaıdy,-dep uıymdastyrýshylar bolashaq qatysýshylarǵa úndeý tastady.

«Qazcontent» AQ Basqarma Tóraǵasy Evgenıı Kochetovtyń aıtýynsha, uıaly telefon bizdiń ómirimizdiń ajyramas bóligine aınaldy, sondyqtan da uıymdastyrýshylar budan barynsha paıda alýdy usynady.

«Aıyna bir ret biz uıaly telefonǵa túsirilgen beıne jeńimpazyna 200 myń teńge tabystaıtyn bolamyz.  Budan basqa, úzdik beıneler Bnews jáne BAQ jańalyqtar portalynda ornalastyrylatyn bolady. Basty krıterıı – ornalastyrylǵan birinshi táýlik ishinde beıneniń múmkindiginshe kóp qaralýy. Sizge, eń bastysy, beıneni kaztube.kz portalyna júkteý kerek, sodan bastap, siz avtomatty túrde 200 myń teńge utysyna qatysasyz», - deıdi ol óziniń Facebook paraqshasynda.

«Qazcontent» AQ-nyń otandyq naryqtyń medıa salasyndaǵy jetekshi oıynshylarynyń biri ekendigin atap ótemiz. Byltyr kompanıa barlyq jobalarǵa qatysty aýqymdy rebrendıng ótkizdi.