«Bılikti basyp alýǵa árekettený» isimen sottalǵan Qyrǵyzstannyń burynǵy memlekettik hatshysy jáne burynǵy depýtat Dastan Sarygýlov el prezıdenti Sooronbaı Jeenbekovke ashyq hat joldady dep habarlaıdy Qamshy.kz aqparat agenttigi azattyq.org saıtynyń deregine súıenip. Onda opozısıalyq belsendi prezıdentten "bılikti basyp alýǵa árekettený" qylmystyq isin baqylaýǵa alýdy suraǵan. Sarygýlov sottalǵan saıasatkerlder isin tekserý úshin táýelsiz komısıa qurý kerektigin aıtqan. Onyń aıtýynsha, tergeý kezinde zań buzylyp, aıyptalǵandardyń quqyǵy taptalǵan.

"Árıne, prezıdent sot júıesi isine aralasa almaıdy. Alaıda ol sot prosesteri kezinde zańnyń saqtalýyn baqylaı alady" degen 70 jastaǵy Sarygýlov prezıdent bul úndeýge nazar aýdarmaıtyn bolsa, ózge de saıasatkerlerdiń ashtyq aksıasyna qosylatynyn aıtady.

Ótken jyly sáýir aıynda Bishkektegi Birinshi maı aýdandyq soty Ernest Karybekovti - 20 jylǵa, Qýbanychbek Qadyrov pen Bektur Asanovty - 12 jylǵa kesip, al Dastan Sarygýlovty tórt jyl shartty jazaǵa tartqan bolatyn. Al bıylǵy 7 aqpanda qalalyq sot birinshi ınstansıadaǵy sot sheshimin ózgerissiz qaldyrdy. Aldyńǵy sot Ernest Karybekovti "asa aýyr qylmystardy búrkemeledi" jáne "otanǵa opasyzdyq" jasady dep tapsa, Qýbanychbek Qadyrov pen Bektur Asanovty "bılikti kúshpen basyp alýǵa nemese bılikti kúshpen ustap turýǵa ázirlendi" dep aıyptap, kináli dep shyǵarǵan. Dastan Sarygýlov bolsa, " asa aýyr qylmystardy búrkemeledi" dep aıyptalǵan

Bıylǵy aqpan aıynyń basynda qamaýdaǵy Karybekov, Qadyrov jáne Asanov ózderiniń quqyǵy buzylǵanyna narazylyq tanytyp, ashtyq jarıalaǵan. Qyrǵyzstannyń jazany atqarý memlekettik qyzmetiniń resmı ókili Aleksandr Nıksdorf jýrnalıserge saıasatkerlerdi dárigerler baqylaýǵa alǵanyn jáne jaǵdaılary «salystyrmaly túrde táýir» ekenin aıtqan.