Qazaqstanda Shyndyq qaıtys boldy... Keshe atyp ketti... Jaǵympazdar mınıstri, Ótirik mınıstri, Mafıa mınıstri, Taqqumar mınıstri, Baqqumar mınıstri, ártis depýtattar, klandar men jylandar keldi. Shyndyqtyń janazasyna...
Halyq kóp jınaldy. 
--SHyndyqsyz qalaı el bolamyz?—dep Ótirik mınıstri qorsyldap jylady... 
--Talaı soraqyny halyqtan jasyrǵan elmiz, sonyń bárin Shyndyq jarıaǵa jar salyp júrýshi edi, endi qaıttik?—dep Jaǵympazdar mınıstri Ótirik mınıstrin jaǵympazdana qushaqtap, suq saýsaǵymen tilin jalap, kóziniń aınalasyn sýlap qoıdy...
--Hosh, Shyndyq aǵa!
--Topyraǵyń torqa, ishkeniń vıskı, jegeniń taýyq grıli bolsyn!
Molda Shyndyqtyń janazasyn shyǵara bastady. Nópir halyqtyń aldyna shyqqan Ótirik pen Jaǵympazdar, Mafıa men Namyssyzdar mınıstrleri men ártis depýtattar qazdaı tizilip, bári portfelderin qoltyqtaryna qysyp alyp, shirenip tura qalysty. Bastaryn tómen salbyratyp turýdyń ornyna, qasqaıyp, shalqaıyp ketti... Bular ólmeıtindeı... Molda Shyndyq aǵaıdyń janazasyn shyǵaryp jatyr, áne eki qolyn qulaqtaryna apardy. O, toba, Mafıa mınıstri pıstoletin shyǵaryp, sonysymen qulaǵyn qasydy. Ótirik mınıstri Elbasyǵa jalǵan aqparat berip úırenip qalǵan ǵoı, áldekimge uıaly telefonymen ótirik aqparat berip jatty... Taqqumar mınıstri kresloda otyr...
Bir kezde molda basyn oń jaqqa, sosyn sol jaqqa qısaıtyp edi, álgilerdiń moıyndary burylmaı qaldy. Moıyndary siresip, qatyp qalǵan... Shyndyqqa burylmaıtyn moıyndar...
--Ýa, elimizdiń qaımaqtary men jaımaqtary!—dedi molda Shyndyqtyń janazasyn shyǵaryp bolǵan soń,--SHyndyq qandaı adam edi?
--«Moshnyı» adam edi!—dedi shala qazaq bireý mińgirlep.
--Aıtqany «tochnyı» adam edi!—dedi alystaý turyp, aýzyn basa qoıǵan Jaltaq degen aqsaqal.
--Ótirik aıtpańdar!—dep qaldy Ótirik mınıstri galstýgyn qozǵap qoıyp.
--Qylda nesi bar deseıshi? İshi pysyp, qara qyldy qaq jaryp otyrýshy edi jaryq¬tyq...
--Aıtatyny: «Aqqa qudaı jaq»... 
--Talaı saıası qylmystardyń betin ashyp, kóp eńbek etti halyqqa...
--Obal-aı, obal...-dep jalǵan jylady Jaǵympaz mınıstri jan-jaǵyna jaltaqtaı qarap,--bizdiń partıaǵa múshe bolǵanda ǵoı, ólmes pe edi...
Bılik dáliziniń jerdegi «qudaılary» shýlap ketip edi, molda qolyn kóterdi:
--Aıtyńyzdarshy, Shyndyqtyń sizderge qaryzy bar ma edi? Ózi joq bolsa da munda halyq bar. Kóp bolyp...
Mınıstrler jamyrap ketti.
--Maǵan eki mıllıon teńge qaryz!
--Maǵan 370 mıllıon dollar qaryz!
--Maǵan qaryz bolaıyn dep júrgen...
Bir kezde tabytta jatqan Shyndyq basyn kóterdi. Ólikti tiriltetin ótirikke jany shydamasa kerek. Ol eshkimge qaryz emes edi. Sol-aq eken, álginde ǵana shyrt túkirip, shirenip turǵandar tym-tyraqaı qasha jóneldi...

Muhtar Sherim