Sońǵy aýys-túıistiń barysynda, Alash balasyn qýantqan jańalyq, kóshi qon komıtetiniń qaıtadan qurylyp, Eńbek jáne halyqty áleýmettik qorǵaý mınıstrliginiń quramyna engeni boldy. Buǵan deıin de komıtet bolyp, agenttik bolyp ómir súrgen kóshi-qon 2011 jyly İshki ister mınıstrliginiń quzyryna berilip, ábden turalaǵan edi. Bulaı deýimizge sebep: 2012 jyly Úkimet kóshi qonǵa bólinetin kvotany múldem toqtatyp tastady. Sóıtip, 2011-2014 jyldar aralyǵynda jyl saıyn 10 myń otbasyǵa kvota bólip berýdi qarastyrǵan Úkimet óz qaýlysyna ózi qarsy shyǵyp kóshtiń betin keri qaıtaryp tastady. Al, İshki ister mınıstrligi qazaq kóshin jaldamaly eńbek kúshiniń deńgeıine deıin túsirip jiberdi. 1991 jyldan bastalǵan kósh, keıbir málimetterge súıensek, 1 jarym mıllıon qazaqtyń elge qosylýyna muryndyq bolǵan kórinedi. Iá, óz jurtynda qazaq qara ormandaı qalyń elge aınalyp úlgeripti. Mine, osy jaıt áldekimderge unamaıtyn bolsa kerek, sońǵy birer jyldyń shıreginde qazaq kóshine qarsy jumys qarqyn aldy. Qandaıda bir keleńsiz jaıtqa Atajurtyna oralǵan qazaqty aıypty sanaıtyn pikirler kóbeıdi. Sol kóp pikirdiń biri Jańaózen oqıǵasy kezinde resmı tulǵalardyń aýzynan da shyǵyp ketti. Jeti aı boıy áleýmettik ádildikti talap etken munaıshylardyń muńyn túsine almaǵan Úkimet «osynyń bárin uıymdastyryp, páleni bastap júrgen oralmandar» dep soqty. Bul, anyǵynda qazaq Úkimetiniń qazaq máselesine, ulttyq múddege qarsy áreketin áshkerelegen ustanymy edi. Alaıda, Jańaózendegi jappaı tártipsizdiktiń saldarynan isti bolǵan adamdar qatarynan oralman mártebesi bar bir pende tabylmady. Qazir Qytaıda qazaq mektepteri derlik jabyldy. Ózbekstandaǵy 565-ten asa qazaq mektebiniń 40-50-i ǵana qaldy. Bizdiń «Máńgilik dosymyz» Reseıde qazaq mektebi týraly tipti aıtýǵa da bolmaıdy. Qysqasy, biz aldaǵy az jyldarda syrttaǵy bar qazaǵymyzdan aırylyp qalýymyz múmkin. Nege? Sebebi, tegi qazaq bolǵanymen tili qytaılanǵan, ózbektengen, orystanǵan, parsylanǵan qazaq qazaq bolmaıdy. Kóshi qon saıasaty - uly saıasat. Osyny Serik Ahmetov Úkimeti bek túsinip áreket etse jón bolar edi...

«31» arna