Ataqty, abyroıy shashaqty, moıny jýan, qoldary byrtıǵan mıllıarder oqqaǵarlarymen birge Gollıvýd aktrısasy, porno juldyz Baı Lınn jatqan qonaq úıdiń lúks bólmesine kirip keldi. Kelgen boıda:

–Bizben birge júrińiz! –dep buıyrdy. Aýdarmashy jigit aýzy–basyn qısańdatyp sóılep, tárjimálap berdi.

–Qaıda? –dep surady Óskemenge Gollıvýd akterlerimen birge derekti fılm túsirýge kelgen sheteldik porno–juldyz, ataqty, álemdik  jalańash qyz.

–Bizdiń toıǵa. Qonaq bolasyz!

–Jo–joq, rahmet, keshe ǵana meshitke barǵan edik, qazaqtar kóshede bolsyn, qonaq úıde bolsyn, betime túkirip jatyr, túkirip jatyr! Túkirikteri taýsylmaıdy eken?

–Biz túkirmeımiz! Biz maqtanshaq qazaqtarmyz!

–Ákimderińizden ruqsat surańyzdar!

–Toı ákimniń toıy emes!

–Barmaımyn...

–Meshit moldasymen sýretke túskende, quran oqylyp,  qol jaıǵanda páledeısiz! Balamnyń úılený toıyna nege barmaısyz?

–Men sizdi tanymaımyn! Dostarymmen aqyldasaıyn?

–Bizdi aqsha  tanystyrady! Bir mıllıon dollar jete me?

Baı Lınniń kózderi oınap ketti, «Ne degen aqymaq qazaq?» degen oı sanasyna boılap ketti. Ernin tistelep, erine sóıledi.

–Toıǵa baramyn da, jáı otyramyn ba? –dep surady sosyn.

–Jartylaı jalańash otyrasyz. Qudaǵıymnyń qasynda. Sosyn qazaqtyń jalańashtanǵan qyzdarymen strıptız bıleısiz, jarysasyz! –dedi mıllıarder. Aýdarmashy jigit tárjimalap edi, Baı Lınn jymıdy:

–Oo, sizderde de porno juldyzdar bar ma edi?

–Jabaıy juldyzdar kóp. Sosyn erteńine qudalyqta bolasyz. Sosyn bir týysym balasyna súndet toı jasaıdy, soǵan qatysyp, bir aı boıy úılený,  ajyrasý, túshkirý 50, 51, 52, 53 ,54, 55, 56, 57, 58, 59, 60 jas mereı toılaryna barasyz! Biz siz ketken soń maqtanatyn bolamyz! «Bizdiń toılarǵa Gollıvýd jalańashy Baı Lınnniń ózi qatysyp, qýyrylǵan balyq jedi!» dep...

–Toıyńyzda moldalar bolady ma?

–Moldada basyń, tósegińde shashyń qalsyn! –dedi mıllıoner yńyrana sóılep, –meshit moldasy saǵan  kóziniń qıyǵymen qarap sýretke túsken eken, basy pálege qaldy! Onyń qandaı jazyǵy bar? Seniń kesirińnen «bissimillásin» umytyp qala jazdady!

–Qudaǵı degen ne? –dep surady Baı.

–Qudaǵı degen qudaǵı! Qudanyń qatyny.

–Al, quda degen ne?

–Ol Qudaǵıdyń baıy!

–O, qudanyń qasynda otyramyn!

–Ekeýiniń ortasyna!

Toı bastalǵannan qudaǵı janynda jartylaı jalańash otyrǵan Baı Lındi jaqtyrmady. Al, qudasynyń jany kirip, jyrtań–jyrtań etedi. Bir kezde qyzǵanyshtan jarylǵan qudaǵı porno–juldyzdyń betine bir kese ystyq sháı shashyp jiberdi. Onymen qoımaı, murnyna meıiz tyqty. Qulaǵyna salat saldy. Aýdarmashy jigit sasyp qalyp:

–Bizdiń eldiń dástúri ǵoı. Sizge degen qurmeti, –dep jymıǵan boldy.  Qudaǵı qarap turmady, porno–juldyzdyń shashyn tarap turmady. Shashynan súırep, ortaǵa alyp shyqty da, bıiktigi alty metr keletin alyp torttyń ishine súńgitip jiberdi! Sol tortqa malynǵan kúıinde jalańash qyzdy óltirip almaıyq dedi me,  mıllıarderdiń oq qaǵarlary qonaq úıge aparyp tastady. Baı Lınn jylap otyr, janyndaǵy dostary ústindegi torttan jalap otyr... Endi biri bir mıllıon dollardy sanap otyr... O, maqtanshaq qazaq, meshitińdi shaıtannan tazala!

Muhtar Sherim