19 aqpanda Qazaqstan Boks federasıasynyń tóreshilik komısıasy 2017 jyldyń qorytyndysy boıynsha jeńimpazdardy anyqtady, dep habarlaıdy Qamshy.kz aqparat agenttigi.
«Úzdik referı» ataǵyna Qaırat Jumanqulov ıe boldy, «Úzdik tóreshi» – Erjan Ospanbek, «Halyqaralyq arenadaǵy eń úzdik tóreshi» – Natalá Soı. Jeńimpazdarǵa 1 000 000 – 1 500 000 teńge kóleminde qarjylaı syılyq berildi.
Qazaqstan Boks federasıasy 2017 jyly 42 sporttyq is-shara ótkizgen. Onyń ishinde ár túrli jastaǵy boksshylar arasynda alty ret respýblıka chempıonaty ótkizildi. Barlyq baıqaýǵa 79 tóreshi qatysty.
Aıta keteıik, búginde Qazaqstanda Halyqaralyq boks qaýymdastyǵynyń eń joǵary sanaty «3 juldyzǵa» ıe 9 tóreshi, «2 juldyzǵa» ıe 10 tóreshi jáne «1 juldyzǵa» ıe 15 tóreshi bar.
Halyqaralyq dárejedegi tóreshilermen qosa, basqa sanattaǵy tóreshilerdiń de sany kóp. Byltyr ondaı tóreshilerge arnap eki semınar men úsh attestasıa ótken, 2018 jyly osyndaı is-sharalar kóbeıedi dep josparlanyp otyr. Bul týraly Qazaqstan federasıasy boksynyń vıse-prezıdenti Baýyrjan Ospanov aıtty.
– Bizdiń mindetimiz – jańa, jas tóreshilerdi tárbıelep shyǵarý. Byltyr halyqaralyq deńgeıdegi sheteldik mamandardyń, tájirıbeli tóreshilerdiń qatysýymen semınarlar men attestasıalar ótti.
Kóp jaǵdaıda «tóreshiler ádiletsizdik jasady» dep aryzdanyp jatady. Negizi munyń bári tóreshilerdiń biliktiliginiń tómendiginen. Eger olardyń dárejesi bizdiń sportshylarymyzben teńesse, Qazaqstan quramasyna úzdik balalar kiretin bolady. Bári tómennen bastalýy kerek. Aýdandyq, oblystyq týrnırlerden, Qazaqstan chempıonattarynan úzdik sportshylardy saralap alýymyz kerek.
Sonymen qosa, sportshylarǵa «jerlesim eken» dep kómektesý de orynsyz. Qazaqstan quramasyna úzdiktiń úzdigi ený kerek. Sebebi halyqaralyq jarystar men álemdik arenalarda olar aýdan, oblystyń emes, búkil Qazaqstannyń namysyn qorǵaıdy. Sol úshin biz jyl ishinde ár jarystan soń bal qoıyp, úzdik tóreshilerdi anyqtap, olardy marapattadyq.
– Tóreshilerdi qalaı jáne qaıdan jınaısyzdar?
– Byltyr biz alǵashqy 50 qazaqstandyq tóreshini barlyq aýdannan jınadyq. Solardyń arqasynda semınarlar men attestasıalar ótkizip turamyz.
Byltyr 10 adam tóreshiler qatarynan shyǵaryldy. Olardyń ornyna jańa 10 tóreshi keldi. Kóbiniń tájirıbesi mol. Endigi joly tóreshilerge qatysty talaptar kúsheıedi. Qatelik jibergender birneshe jyl ter tókken eńbekterine qaramastan qatań jazalanady. Tipti, ómir boıyna dıskvalıfıkasıalanýy múmkin.
Qazir biz tóreshilikke áıel adamdardy tartýdy josparlap otyrmyz. Halyqaralyq tájirıbe men AIBA usynysyna sáıkes, tóreshilerdiń 30 paıyzy áıel adamdar bolýy kerek. Bizde tóreshilikke nıet bildirýshiler kóp. Bári ashyq túrde ótetin bolady. Tóreshi bolýǵa nıetti adam attestasıa tapsyrsa, biz jańa múmkindik berýge qashan da daıynbyz.
– Jalpy Qazaqstanda qansha tóreshi bar?
– Tóreshi kóp. Tek olar 3 dárejege bólinedi. Al Qazaqstan boıynsha belsendi túrde tóreshi bolyp júrgen 50 tóreshi bar. Jalpy sany 100-den asady.
– Qazaqstandyq tóreshilerdi sheteldegi halyqaralyq jarystarǵa shaqyryp tura ma?
– Qazaqstan boks derjavasy bolǵandyqtan, shaqyrtýlar da kóp. Tek qarjy máselesi qysyp tur. Sondyqtan biz byltyr oblystardan eń bolmaǵanda úsh-tórt tóreshini qarjylandyrý máselesin kóterdik. Federasıa nebári 10 tóreshige aılyq tóleıdi. Onyń ózinde kóp emes. Al qalǵandary jarystarǵa shyǵýyna baılanysty alady. Tóreshilerimizdiń álemdik arenaǵa shyǵyp turýy Qazaqstan ımıjin de kóteretin edi. Búginde olarǵa qoıatyn bir talabymyz bar – biliktiligi joǵary ári ádil bolsa deımiz. Bizdiń sportshylarymyzǵa odan artyq kómektiń qajeti joq. Sebebi Qazaqstanda ár ekinshi azamat boksqa qyzyǵady, tóreshilerdiń ádiletsizdigin de birden baıqap qoıady.
«Halyqaralyq arenadaǵy eń úzdik tóreshi» marapatyna ıe bolǵan Natalá Soı eńbeginiń baǵalanǵanyna rızashylyǵyn bildirdi. Kásipqoı boksshy bolǵan Natalá tóreshilik qyzmetpen 10 jyldan beri aınalysyp keledi. Onyń aıtýynsha, boksshy bolý men tóreshi bolýdyń arasynda jer men kókteı aıyrmashylyq bar.
– Boksshy tek ózi úshin judyryqtasady, óziniń qamyn oılaıdy. Al tóreshi ózgelerdiń ádil baǵalanýyn qadaǵalaıdy. Sondyqtan ekeýi eki bólek dúnıe, – dedi tóreshi áıel.
