Almaty oblysyndaǵy desanttyq-shabýyldaýshy áskerleriniń 11 áskerı bólimi arasynda «Jaýyngerlik dostastyq» saıysy aıaqtaldy. Bul týraly Qamshy.kz aqparat agenttigi habarlaıdy.

Desantshylar bes kún boıy Jarkent qalasynda ornalasqan 74261 áskerı bóliminde 5 áskerı-kásibı kezeńnen turatyn saıysta baq synasty. Áskerı qyzmetshiler kásibı biliktiligimen qosa jaýyngerlik daıyndyǵy boıynsha da baǵalandy. 

3 er jáne 1 áıel adamnan quralǵan ár komanda  arnaıy, atý jáne dene daıyndyqtary boıynsha jarysqa tústi. Atý daıyndyǵynda qatysýshylar jatyp atý, tizerlep atý, turyp atý sıaqty ártúrli jaǵdaıda qarýdy jetik meńgergen mergen ekendigin dáleldedi.   Dene daıyndyǵy kezeńine granata laqtyrý, 100 m, 1 jáne 3 km júgirý, beltemirge tartylý, túrli kedergilerden ótý, avtomatty shashyp-jınaý  syndy t.b tapsyrmalar engizilgen.

Qatysýshylar bilekten ǵana emes, bilimnen de synaldy. Qazaqstan tarıhy men halyqaralyq gýmanıtarlyq quqyq pánderin qamtyǵan 50 suraqtan turatyn test tapsyrmasy zıatkerdi anyqtap berdi. Qorytyndy kezeńde áskerıler jaýyngerlik daıyndyqtan bólek shyǵarmashylyq daryn ıeleri ekenin kórsetti.    

Bul «ArMI-2018» halyqaralyq saıysyna daıyndyq kezeńi. Qamtylǵan kezeńder soǵys alańynda oryn alatyn jaǵdaılarǵa negizdelip qurastyrylǵan. Búgin biz Almaty oblysy boıynsha úzdikterdi anyqtatyd. Endi jeńimpazdar Desanttyq-shabýyldaýshy áskerleri, QK Qurlyq áskerleri boıynsha irikteý kezeńderine qatysyp, bálkim halyqaralyq deńgeıge joldama alýy múmkin, - dep atap ótti tóreshi serjant Amanjol Hasenov.

Saıys qorytyndysy boıynsha úzdik nátıjeler anyqtaldy. Birinshi oryndy Almaty qalasynda ornalasqan 61993 áskerı bólimi ıelendi. Áskerı qyzmetshi áıelder arasynda birinshi orynǵa Saryózektegi 12740 á/b kishi serjanty Baǵlan Talǵatova laıyq dep tanyldy. Jeńimpazdar gramota jáne qundy syılyqtarmen marapattaldy.

«Jaýyngerlik dostastyq» saıysy Armıa halyqaralyq oıyndarynyń quramyna bekitilgen. TMD qatysýshy-memleketteriniń Qorǵanys mınıstrleri keńesiniń sheshimine sáıkes 2009 jyldan beri ótkizilip keledi. 

Bıyl «ArMI-2018» saıysy 28 shilde men 11 tamyz aralyǵynda alty memlekettiń aýmaǵynda ótkiziledi dep josparlanǵan.