"Nur Otan" tóraǵasynyń birinshi orynbasary Máýlen Áshimbaev Facebook áleýmettik jelisinde tirkeldi dep habarlaıdy Qamshy.kz aqparat agenttigi. 

Máýlen Áshimbaev jeke akkaýntyn ashý burynnan josparda bolǵanyn aıtady.  "Nur Otan" tóraǵasynyń birinshi orynbasary Facebook-te alǵashqy jazbasyn jarıalady. 

—Ýaqyt ótken saıyn ınternet pen áleýmettik jeliler ómirimizdiń ajyramas bir bóligine aınalyp keledi. Tehnologıalar da bir orynda turmaıdy. Qoǵamymyz da ózgerýde. Sondyqtan biz de zamanǵa saı ózgerip, jetile túsýge tıispiz.

Jeke akkaýntymdy ashý burynnan oıymda júrgen is edi. Alaıda, ártúrli sebeptermen bul bastama keıinge shegerile berdi.

Al búginde partıamyz jańǵyrýdyń jańa bıigine bet túzep, aýqymdy jumystardy qolǵa alǵan shaqta meniń de Facebook-ke tirkelýim zańdy qubylys ári der kezinde jasalǵan qadam dep esepteımin. Sebebi, bul jerde ártúrli ıdeıalar kópshiliktiń nazaryna usynylyp, qyzý talqylanatyny belgili. Olardyń arasynda bizdiń saıası uıym úshin de paıdaly bolýy múmkin ózekti oılar aıtylyp jatady.

Sondyqtan bizge de Facebook arqyly eń ózekti máselelerdi talqylaýǵa múmkindik týatynyna senemin. Eger Sizdiń «Nur Otannyń» jumysyna qatysty syndarly pikirińiz, partıa qyzmetin jańǵyrtý jóninde naqty usynystaryńyz jáne basqa da máselelerge qatysty oılaryńyz bolsa ony árdaıym jeke habarlama arqyly nemese m.ashimbayev@nurotan.kz elektrondy pochtama hat retinde joldaı alasyzdar.

Ózderińizden utymdy oılar men parasatty pikirler bolatynyna senim bildiremin!, - dep jazdy Máýlen Áshimbaev. 

Buǵan deıin birneshe sheneýnik áleýmettik jelige tirkelgen bolatyn. Olardyń arasynda QR Aqparat jáne komýnıkasıalar mınıstri Dáýren Abaev, QR Mádenıet jáne sport mınıstri Arystanbek Muhamedıuly, Astana qalasynyń ákimi Áset Isekeshov bar. Aty atalǵan sheneýnikter paraqshalarynda qyzmetine qatysty jańalyqtarmen bólisedi. 

Qazaqstanda halyqqa jaqyn bolý maqsatynda áleýmettik jelide óz paraqshasyn ashqan sheneýnikterdiń qatary kóbeıip keledi. Halyq vedomstva basshysyna kókeıdegi suraqtardy jeli arqyly qoıyp, oǵan jaýap ala alady.