Qazaqstan jazýshylar odaǵynyń jańa tóraǵasy Ulyqbek Esdaýlet odaqtaǵy jumysyna qatysty josparyn aıtty, dep habarlaıdy Qamshy.kz aqparat agenttigi. 

- Birden qıratyp tastaımyz, ádebıetti órkendetip jiberemiz dep aıta almaımyn. Úlken-úlken, bıik ýádelerdi bere almaımyn. "Aryq aıtyp, semiz shyq" degen sóz bar. Jazýshylar odaǵy batyp otyrǵan shyǵyndardan qutylýymyz kerek. Alty aı boıy jazýshylar odaǵynyń qyzmetkerleri aılyq degendi kórgen joqpyz. Salyq pen jalaqyny tóleı almaı otyrǵan jazýshylar odaǵyna meni tóraǵa etip saılap, úlken jaýapkershilik júktep qoıdy. Buǵan qatty qýanarlyqtaı jaǵdaıym joq. Men ıyǵyma túsip turǵan aýyr júkti sezip turmyn. Endigi maqsat -  Jazýshylar odaǵynyń jaǵdaıyn túzetý. Jazýshylardyń jaǵdaıyn jasaý sekildi másele sonymen qosa júredi. "Rýhanı jańǵyrýǵa" baılanysty jańa jobalar jasap, joǵary jaqqa usynsaq degen oıymyz bar. Qalaı bolǵanda da boıymyzdaǵy barlyq kúsh-jigerimizdi, bar talantymyzdy, tájirıbemizdi, jastarymyzda bar lapyldaǵan otty, olardyń jańasha oılaý qabiletin jazýshylar odaǵyn jańa deńgeıge kóterýge jumsaımyz. Ádebıettiń ıgiligi, damýy úshin jumys isteımiz, - dedi Ulyqbek Esdaýlet.