Memleket basshysy Germanıa Federatıvtik Respýblıkasynyń Kansleri laýazymyna qaıta saılanǵan Angela Merkeldi quttyqtady.

«Ótken parlamenttik saılaýdaǵy jeńisińiz – Germanıa azamattarynyń Sizge, sondaı-aq Germanıa Federatıvtik Respýblıkasynyń Eýropadaǵy jáne álemdegi ornyn nyǵaıtýǵa, elińizdiń áleýmettik-ekonomıkalyq ahýalyn jaqsartýǵa baǵyttalǵan saıasatyńyzǵa degen seniminiń dáleli.

Sizdiń basshylyǵyńyzben Germanıanyń jańa Federaldyq úkimeti Qazaqstan men Germanıa arasyndaǵy ózara tıimdi yntymaqtastyqty odan ári damyta túsedi dep senemin.

Sizge osy jaýapty qyzmette tabys tileımin, sondaı-aq barsha Germanıa halqynyń ósip-órkendeýine nıettestik bildiremin», – delingen jedelhatta.

Aıta keteıik, Germanıada Býndestag depýtattary sársenbi kúni Hrıstıan-demokratıalyq odaǵynyń lıderi (HDO) Angela Merkeldi Germanıa kanslerligine saılady. Osylaısha, Merkel tórtinshi ret qatarynan GFR kansleri bolyp saılandy.