Nursultan Nazarbaev Ortalyq Azıa elderiniń basshylaryn Aqordada qarsy alyp, búgingi kezdesýdiń mańyzdylyǵyna toqtalyp ótti, dep habarlaıdy Qamshy.kz aqparat agenttigi. 

– Búgin Astanada Tájikstan, Ózbekstan, Qyrǵyzstan prezıdentteri men Túrkmenstan parlamenti basshysymen kezdesip otyrmyz. Elimizdiń astanasynda sizderdi kórgenime óte qýanyshtymyn. Ortalyq Azıa elderi basshylarynyń konsýltatıvtik kezdesýin ótkizý bastamasyn Ózbekstan prezıdenti Shavkat Mırzıaev kótergen bolatyn. Búgin ózderińizben aqyldasa otyryp, kóptegen máseleniń sheshimin tabamyz. Sońǵy ret 9 jyl buryn kezdesip edik. Sodan beri jınalǵanymyz osy. Árıne, bir-birimizben qarym-qatynasymyzdy úzgen joqpyz, kezdesip, aralasyp turdyq, alaıda barlyǵymyz jınalǵan basqosý bolmady. Búgingi jumys tártibimizdi bylaısha josparlaýǵa usynys bildiremin: eń aldymen men pikirimdi aıtaıyn, keıinnen árkim óz qalaýy boıynsha sóılesin, - dedi Elbasy óziniń kirispe sózinde.

Ary qaraı Nursultan Nazarbaev osy ýaqytqa deıin atqarylǵan jumystarǵa toqtalyp, búgingi kezdesýdiń maqsatyn aıtyp ótti.

– Qazaqstan qashan da kórshilerimen tyǵyz ekonomıkalyq qarym-qatynas ornatýdy kózdegen. Ásirese, túbimiz bir, mádenıetimiz ben tarıhymyz ortaq bolǵan Ortalyq Azıa memleketterimen. Mundaı kezdesýlerdiń basty sebebi – birinshiden, memleketterdiń potensıalyn biriktirý; ekinshiden, ózara saýda-sattyq aınalymyn ulǵaıtý; úshinshiden, memleket qaýipsizdigin nyǵaıtý; tórtinshiden, atalmysh elderdiń halqyn jaqyndastyrý. Sońǵy jyldary bul elderdiń arasynda saıası qatynas nyǵaıa túskenine qýanamyn.

Men BUU Qaýipsizdik Keńesinde tóraǵa qyzmetin atqarǵan kezimde bizdiń mınıstrlerdi Nú-Iork qalasynda kórip qýanyp qaldym, bul úlken qoldaý boldy. Sondyqtan biz únemi bir-birimizdi qoldap, birlese jumys atqarýymyz kerek. Byltyrǵy naýryz aıynan bastap bir jyldyń ishinde Ortalyq Azıa elderiniń basshylary bir-birimen kezdesýler ótkizdi. Kórshiles elder arasynda Ózbekstan basshysynyń jumysyn erekshe atap ótkim keledi. Sońǵy 20 jylda sheshimin tappaǵan kóptegen máseleniń basyn ashyp berdi. Sonymen qatar Qyrǵyzstan eliniń jańa basshysynyń da atqarǵan isterin atap ótýge bolady. Tájikstan p«rezıdenti Emomalı Rahmon myrza da bıyl sý máselesine qatysty óte joǵary deńgeıdegi konferensıa uıymdastyryp otyr. Biz ony qashan da qoldaımyz. Bıyl Araldy qutqarý uıymyna 25 jyl tolyp otyr, – dedi Elbasy.

Aıta keteıik, Ortalyq Azıa elderi, sonyń ishinde Qazaqstan, Qyrǵyz Respýblıkasy, Tájikstan, Túrikmenstan jáne Ózbekstan basshylarynyń konsýltatıvtik kezdesýi 5 memleket arasyndaǵy ekonomıka, saýda-sattyq, ınfraqurylym, logıstıka salasyndaǵy máselelerdi sheshýge baǵyttalǵan.