Bul týraly Almaty qalasy Óńirlik komýnıkasıalar qyzmetinde qalalyq Dene shynyqtyrý jáne sport basqarmasynyń basshysy Ábil Dóńbaev málimdedi, dep jazady Qamshy.kz aqparat agenttigi.
Onyń sózine súıensek, 2017 jyldyń nátıjeleri boıynsha 3 172 túrli sporttyq buqaralyq sharalar ótkizilgen, olardyń ishinde chempıonattar, túrli sport túrinen birinshilikter, barlyq qala turǵyndaryn qamtıtyn jarystar men spartakıadalar jáne taǵy da basqalary.
"Qazirgi tańda, sportpen shúǵyldanýshylar sany 536 390 adam nemese jalpy turǵyndar sanynyń 30% quraıdy", - dep atap ótti basqarma basshysy.
Elbasymyzdyń qoldaýymen osy jyly dúbirli sporttyq oqıǵalardyń biri 2017 jyly qańtardyń 29-y men aqpannyń 8-i aralyǵynda 28-shi Búkilálemdik qysqy Ýnıversıada Almatyda ótti. Bul el tarıhyndaǵy eń aýqymdy sporttyq dodalardyń biri de biregeıi boldy.
Ýnıversıada jarystarynda 12 sport túrinen (bıatlon, taý shańǵy sporty, kórlıng, kónkımen júgirý sporty, shańǵy qossaıysy, shańǵy jarysy, shańǵymen tuǵyrdan sekiris, snoýbord, mánerlep syrǵanaý, shaıbaly hokeı, frıstaıl, short-trek).
Almatyda ótken eleýli oqıǵa – Ýnıversıadaǵa 57 memleketten kelgen baq synasty. Bul qysqy ýnıversıada tarıhyndaǵy eń joǵarǵy kórsetkish bolyp tabylady. Qatysýshylardyń jalpy sany 2498 adam: 1631 sportshy, 867 resmı tulǵalar (delegasıa basshylary, bapkerler, medısına qyzmetkerleri, BAQ).
Jalpy, Almatyda 117 sport túri damyp keledi. Olardyń: 38-i – jazǵy Olımpıada sport túrleri, 12-si – qysqy Olımpıada sport túrleri jáne 67 -si – Olımpıdalyq emes sport túrleri. Sonymen qatar, Almaty quramasynyń respýblıkalyq keshendi sharalarda kórsetken nátıjelerin atap ótkim keledi: osy jyly Almaty komandasy IV Jastar oıyndarynda birinishi oryndy ıelense, sondaı-aq, 2016 jyly mektep jáne kolej oqýshylary arasynda ótken Spartakıadada jalpykomandalyq esepte jeńis tuǵyrynan kórindi.
Sonymen qatar, Almaty quramasy jalpykomandalyq esepte 571 upaı jınap, IV qysqy respýblıkalyq spartakıadada birinshi oryndy ıelengen. Al bıyl Basqarma ulttyq tańdaýynyń nátıjesinde 75 865 daýys jınap "Úzdik sporttyq óńir" atandy.
