Astanada óz balalaryn tepkiniń astyna alyp, qyzynyń mıyn shaıqaltqan áke áli kúnge deıin jaýapqa tartylmaǵan. Osylaı dep bizge shaǵym aıtyp kelgen kópbalalaly ana janaıqaıyn jetkizdi. Ol burynǵy kúıeýiniń ústinen buǵan deıin de talaı márte shaǵymdanypty. Alaıda, quzyrly organdar belgisiz sebeptermen isti jaýyp tastaıtynyn alǵa tartady. Kúıeýinen ábden qorlyq kórgen kelinshek onyń kinási dáleldenbeı, jeńil jazamen qutylyp kete me dep kúdiktenip otyr. Bul týraly Qamshy.kz aqparat agenttigi «Eýrazıa» birinshi arnasyna silteme jasap habarlaıdy. 

Gúlnurdyń otbasynda bolǵan sumdyq oqıǵa ózi jaldap turatyn úıdiń syrtqy beınekamerasyna jazylyp qalǵan. Sol kúni ol kúıeýine balalarymen serýendep kelýge ruqsat bergen eken. Beınejazbada bezbúırek ákeniń qara «Jıppen» kelgeni kórinedi. Biraq nege ekeni belgisiz kishkentaı baýyrlaryn kútip alýǵa kelgen 10 jastaǵy Aneldi kókireginen ıterip jiberedi. Ákesinen mundaıdy kútpegen qyz úıine qaraı qashyp bara jatqanda, er adam onyń sońynan qýyp soqqynyń astyna alypty. Keıin qaryndasynyń daýysyn estip syrtqa shyqqan 16 jastaǵy úlken ulyn da tepkilep tastaıdy.    

«Meni tań qaldyrǵany, balamdy soqqyǵa jyqqan áke áli kúnge deıin qamaýǵa alynbaǵan, quzyrly organdar, ony tipti, jaýap alýǵa shaqyrmaǵan syńaıly.  Tek, «qalada joq, sol sebepti shaqyrtpadyq» deıdi. Sonda týǵan balasyn tepkilep, mıyn shaıqaltqan adamnan polısıa qalaısha áli túsinikteme de almaǵan?» - qorlyq kórgen kelinshek Gúlnur.

12 jastaǵy jetkinshektiń mektepten qalyp, aýrýhanada jatqanyna búgin 6 kún bolypty. Dárigerler oǵan mıy shaıqalǵan degen dıagnoz qoıǵan. Aq halattylar kishkentaı qyzdyń saýyǵyp kele jatqanyn jetkizdi. Odan bólek, mamandar sońǵy kezderi úlkenderden jábir kórip, emhanaǵa túsetin balalardyń sany artyp kele jatqanyn da aıtyp qaldy.  

«Bizde qazirgi ýaqytta soqqydan, jábir kórgen balalar jıi kelip túsedi. Ondaı balalar emhanaǵa kelip túsken bette, 102-ge habarlaımyz. Olar kelip máseleni sheshýge tyrysady. Keıbir balalar keledi, tósekten, ústelden qulap túsken. Ol endi ata-anasynyń jaýapsyzdyǵynan» - deıdi №2 balalar aýrýhanasy, neırohırýrgıa bóliminiń meńgerýshisi Erbol Qozybaǵarov.

Ózi men balalarynyń bolashaǵy úshin júzin kórsetkisi kelmegen Gúlnur kúıeýimen 15 jyl boıy bir shańyraqtyń astynda ómir súrdim deıdi. Biraq sodan beri kórgen kúnim qorlyq dep egiledi. Bolmashy nárse úshin judyryq ala júgeretin kúıeýiniń minezine balalary úshin tózip kelipti. 

 «Barlyǵy meni qazir aıyptaýǵa ázir. Nege onyń sondaı minezin bilgende, erterek ajyrasyp ketpediń deıdi. Biraq men balalarym ákesiz óspesin dep, múmkindiginshe onyń jaǵyna shyǵatyn edim. Bári beker eken. Maǵan qol kóterse meıli, biraq týǵan perzentin tepkilep tastaǵanyn qalaı keshirýge bolady?» - qorlyq kórgen kelinshek Gúlnur.

Osy oqıǵaǵa qatysty qalalyq ishki ister departamentine  habarlasqanymyzda, olar oryn alǵan jaǵdaıǵa baılanysty sotqa deıingi tergeý júrip jatqanyn habarlady. Sondyqtan "basqa málimetterdi jarıalaı almaımyz" degennen árige aspady. Odan bólek, Aneldiń jaǵdaıyn elimizdiń bala quqyqtary jónindegi ýákili Zaǵıpa Balıeva da kórip kelipti. 

«Tergeýshilermen birge bardym. Qyz eshteńe aıtpaıdy. Bala ǵoı. Ákesin jaqsy kóredi. Eshqandaı baǵa bere almaımyn. Biraq qazir jaǵdaıy jaqsy. Emdelip jatyr» - deıdi QR Parlamenti Májilisiniń depýtaty, QR Bala quqyqtary jónindegi ýákil Zaǵıpa Balıeva.

Qazir bes balasymen páter jaldap kúneltip otyrǵan kelinshek  «Jıp» minip júrgen bezbúırek ákeniń alıment tólemeýi úshin aılyǵym 40 myń teńge dep jalǵan anyqtama jasatyp alǵanyn aıtady. Biraq Gúlnurǵa ol mańyzdy emes. Kelinshek ózi men balalaryn jaıyna qaldyryp, uly-qyzyna qol kótergen áke zań aldynda jaýap berse deıdi.