Ońtústik Qazaqstan oblysynyń ákimi Janseıit Túımebaev Ulystyń uly kúni - Naýryz merekesi qarsańynda Saryaǵash aýdany Abaı eldimekeninde bolyp, el aǵalarymen, aýyl turǵyndarymen kezdesti, dep habarlaıdy Qamshy.kz aqparat agenttigi Ońtústik Qazaqstan oblysy ákimdiginiń baspasóz qyzmetine silteme jasap.

Basqosýda óńir basshysy Naýryz - tatýlyqqa bastaıtyn meıram ekenin aıta kele, turǵyndardy yntymaqpen birlese eńbek etýge shaqyrdy.

«Memleket retinde qalyptasyp, Táýelsizdikke qol jetkizgenine shırek ǵasyr ǵana bolǵan elimizge tatýlyq pen yntymaq óte qajet. Saryaǵash shekaralyq aımaqta ornalasqan strategıalyq aýdan. Mundaǵy halyqtyń ósimi óte joǵary. Sondyqtan da eldiń áleýmettik jaǵdaıyn jaqsartý maqsatynda Elbasymyzdyń qoldaýymen júıeli jumystar atqarylýda. Munyń bárine eldegi turaqtylyq pen birliktiń arqasynda qol jetkizip otyrmyz. Osy jetistikterimizdi el aǵalary men turǵyndary qoldap, qýattap otyrsa, budan da joǵary jetistikterge qol jetkizýge múmkindigimiz mol», - dedi Janseıit Qanseıituly.

Sondaı-aq, oblys ákimi kezdesý barysynda Abaı aýylynda bolǵan oqıǵaǵa da toqtaldy. Bul máselemen tıisti quzyrly organdardyń aınalysyp jatqanyn aıta kele, bolashaqta mundaı jaǵdaılardyń oryn almaýy úshin el aǵalary, aýyl bıleri birigip, júıeli túrde jumys isteýi kerektinin málimdedi.

Kezdesýde sóz alǵan aýyl bıi M.İlesbekov el ishindegi túrli máselelerdiń der kezinde sheshilýine el bolyp atsalysyp, jumylý qajettigin jetkizdi.

Jıyn sońynda oblys basshysy saryaǵashtyq turǵyndardy Naýryz merekesimen quttyqtap, elimizde tynyshtyq pen berekeniń saltanat qurýyn tiledi.