Elbasynyń tapsyrmasymen QR Premer-mınıstri jumys saparymen Qyzylorda oblysyna bardy, dep habarlaıdy Qamshy.kz aqparat agenttigi QR Premer-mınıstriniń baspasóz qyzmetine silteme jasap.

Sapar maqsaty – Nursultan Nazarbaevtyń «Qazaqstannyń úshinshi jańǵyrýy: jahandyq básekege qabilettilik», «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» Joldaýlary men bes áleýmettik bastamasy aıasynda bergen tapsyrmalarynyń júzege asyrylý barysymen tanysý.

Búgin Baqytjan Saǵyntaev 2018 jyly áleýmettik-ekonomıkalyq damýdyń maqsatty ındıkatorlaryna qol jetkizý boıynsha oblystyń Jobalyq baqylaý jumystarynyń júıesi jáne Memleket basshysynyń Joldaýlaryn iske asyrý máseleleri boıynsha óńir aktıvimen, aýdan ákimderimen jáne bıznes ókilderimen kezdesý ótkizdi.

Kezdesýde Elbasynyń ósimniń jańa modelin qalyptastyrý boıynsha alǵa qoıǵan mindetterin júzege asyrý máseleleri talqylandy, ol úshin ekonomıkanyń barlyq mańyzdy baǵyttary boıynsha jobalyq basqarý júıesi engizildi. Bul — jappaı kásipkerlikti damytý, ınvestısıalar tartý, ındýstrıalandyrý, AÓK, ónimdi jumyspen qamtý, sıfrlandyrý, tehnologıalyq jańǵyrtý jáne Indýstrıa 4.0 elementterin engizý. Árbir joba boıynsha maqsatty kórsetkishter belgilengen.

Qyzylorda oblysynyń ákimi Qyrymbek Kósherbaev óńirdiń jobalyq basqarýy aıasyndaǵy jańa jahandyq shynaıylyq jaǵdaıynda ekonomıkanyń sapaly ári turaqty ósimin qamtamasyz etýge qajetti atqarylyp jatqan jumystar týraly, sondaı-aq negizgi maqsatty ındıkatorlar týraly baıandady.

Kezdesý barysynda Qyzylorda oblysy ekonomıkasynyń qurylymdyq transformasıasyn jáne sapaly ári teńgerimdi ekonomıkalyq ósýdi qamtamasyz etý boıynsha ishki qorlaryn anyqtaý jáne paıdalaný josparlary qaraldy. Osy máselege qatysty ózderi jaýapty baǵyttar boıynsha ulttyq ekonomıka mınıstri T. Súleımenov, ınvestısıalar jáne damý mınıstri J. Qasymbek, aqparat jáne komýnıkasıalar mınıstri D. Abaev sóz sóıledi.

Talqylaýǵa bıznes ókilderi de qatysty. «Atameken» ulttyq kásipkerler palatasy basqarma tóraǵasynyń orynbasary E. Jumaǵazıev jobalyq basqarý mindetterin iske asyrýǵa bıznesti tartýdyń basymdyqty baǵyttary týraly aıtyp berdi.

QR Premer-Mınıstri Baqytjan Saǵyntaev kásipkerlikti damytý Úkimettiń basty basymdyqtarynyń biri ekenin atap ótti. Bul — elimizdiń ekonomıkalyq ósiminiń jańa modelin qurýdyń basty baǵyty. Osyǵan oraı Úkimet kásipkerlik ahýalyn jaqsartý jáne SHOB sýbektileriniń iskerlik belsendiligin yntalandyrý boıynsha júıeli sharalar qabyldap jatyr.

Bızneske qolaıly jaǵdaılar jasaý men qaıta retteýge baǵyttalǵan zań jobasy Parlamentte qaralyp jatyr. Densaýlyq saqtaý jáne bilim berý uıymdaryna qoıylatyn 30-dan astam eskirgen sanıtarlyq erejeler joıylady. Salyqtyq tekserister sany 40%-ke azaıady.

Otandyq bıznesti damytýǵa qoldaý kórsetý maqsatynda Memleket basshysy «Shaǵyn nesıe berýdi kóbeıtý» tórtinshi áleýmettik bastamasyn jarıa etti. Bul maqsatqa qosymsha 20 mlrd teńge bólinedi (aýyldyq jerlerde nesıe berýge — 14 mlrd teńge, qalalarda nesıe berý úshin — 6 mlrd teńge).

Prezıdenttiń tapsyrmasyna sáıkes, ózin-ózi jumyspen qamtyǵan azamattar men halyqtyń ekonomıkalyq belsendi emes toptaryn ekonomıkany damytýǵa tartý jónindegi mindetterdi oryndaýǵa, sondaı-aq sıfrlandyrý men avtomattandyrýdy eskere otyryp mamandardy daıarlaý jáne qaıta daıarlaý máselesine erekshe kóńil bólindi. Oblystyń kadrlyq áleýetin nyǵaıtý, joǵary bilim berýdiń qoljetimdiligi men sapasyn arttyrý, bes áleýmettik bastama sheńberinde stýdent jastardyń jataqhanadaǵy jaǵdaılaryn jaqsartý jónindegi sharalar qaraldy.

Talqylaýdy qorytyndylaı otyryp, Baqytjan Saǵyntaev Úkimet bıznesti damytýǵa ne kedergi keltiretinin, sheshimin tabýdyń qandaı joldary bar ekenin jáne qalaı kómektesýge bolatynyn bilýi qajet ekenin aıtty. Jobalyq basqarý bıznes jáne memlekettik organdarǵa únemi baılanysta bolýǵa, kásipkerlikti damytýdyń máselelerin shuǵyl sheshýge, suraqtar men usynystardy tyńdaýǵa múmkindik beredi. Budan ózge, jańa óndiris oryndaryn ashý men bıznesti nesıelendirý turǵysynan naryq qajettilikterine taldaý jasaý kerektigi kórsetilgen.

QR Premer-Mınıstri Baqytjan Saǵyntaevtyń Qyzylorda oblysyna jumys sapary barysynda Prezıdenttiń bes áleýmettik bastamasyn iske asyrý boıynsha áleýmettik sala qyzmetkerlerimen kezdesý, Indýstrıalyq-ınnovasıalyq damý, AÓK memlekettik baǵdarlamalary sheńberinde jáne ekonomıkany ártaraptandyrý maqsatynda júzege asyrylyp jatqan birqatar ónerkásiptik jáne agrarlyq kásiporyndardy aralaý, sondaı-aq, ǵarysh salasynyń damýymen, Baıqońyr qalasynyń ınfraqurylymy men ǵarysh aılaǵymen tanysý josparlanǵan.