Túrik soty «Fethýllahshylar terorıstik uıymynyń» segiz múshesin tutqyndaýǵa order berdi. Olardyń qatarynda «Túrkıadaǵy Reseı elshisi Andreı Karlovtyń ólimine qatysy bar» degen kúdikpen ustalǵan Fethýllah Gúlen de bar.

Bul týraly jergilikti HABERTÜRK telearnasy habarlady.

Telearna deregine súıensek, sot «Karlovty óltirýge buıryqty Gúlenniń ózi bergen» degen toqtamǵa kelgen. Tutqyndalǵandardyń taǵy úsheýi – polısıa qyzmetkerleri. Buǵan qosa Guru Medya baspa tobynyń basshysy, Túrkıa aqparattyq-kommýnıkasıalyq tehnologıa basqarmasy ári elshi mert bolǵan foto kórmeniń uıymdastyrýshysy ustaldy.

Budan buryn Gúlen Karlovtyń ólimi úshin Túrkıanyń arnaıy qyzmeti men qaýipsizdik qyzmeti jaýapty bolýy kerek dep málimdegen. Reseı sekildi memlekettiń elshisiniń qorǵanysy kúshti bolmaǵanyn essizdik dep te sanaǵan edi.

Eske sala keteıik, 2016 jyly 19 jeltoqsanda Ankaradaǵy foto kórmeniń ashylýynda Reseıdiń Túrkıadaǵy elshisi bolǵan Andreı Karlovty atyp óltirdi. Eldiń Syrtqy ister mınıstrligi oqıǵany terakt dep baǵalady. Al shabýyldy Mevlút Altynshash esimdi polısıa qyzmetkeri jasady.

Fethýllah Gúlen 2016 jyly 16 shildege qaraǵan túni Túrkıada oryn alǵan tóńkeristiń basty uıymdastyrýshysy retinde tanyldy. Qazirgi ýaqytta ol AQSH-ta. Túrik bıligi oppozısıonerdiń elge qaıtarlyýyn talap etken, alaıda Gúlen tóńkeriske esh qatysy joq ekenin aıtyp aqtaldy.