Donald Tramp 20 naýryzda Vladımır Pýtınmen telefon arqyly sóılesken ýaqytta onymen betpe-bet kezdesý múmkindigin talqylaǵan. Bul týraly Aq úıdiń baspasóz hatshysy Sara Sanders habarlady.
AQSH pen Reseı prezıdentteri kezdesýdi qaıda ótkizý yńǵaıly ekenin sóz etken, Aq úıde júzdesý múmkindigin de qarastyrǵan. Sanders eki memleket basshylarynyń qashan kezdesetinin aıtpady, mundaı júzdesý "jaqyn ýaqytta" bolýy múmkin deýmen shekteldi.
Tramp Pýtındi kezdesýge shaqyrǵanyn buǵan deıin Reseı prezıdentiniń kómekshisi Iýrıı Ýshakov habarlaǵan edi. Ol "Skrıpal isi", sodan keıin dıplomattardy elden shyǵarý áreketteri prezıdentterdiń kezdesýin qıyndatyp jiberdi degen.
Tramp pen Pýtınniń telefonmen sóılesýi AQSH bastamasymen júzege asty. Sol kezde AQSH prezıdenti Pýtındi prezıdenttik saılaýdaǵy jeńisimen quttyqtaǵan. The Washington Post málimetine qaraǵanda, Aq úı Trampqa bulaı jasamaýǵa, áńgimeni "Skrıpal isinen" bastaýǵa keńes bergen. AQSH prezıdenti bolsa Reseımen qarym-qatynasy jaqsy ekenin tvıtterinde jazǵan.
26 naýryzda Vashıngton Reseıdiń 60 dıplomatyn elden shyǵaryp, Sıetldegi konsýldyǵyn jabý týraly sheshim shyǵardy. Mundaı qadam Ulybrıtanıada Bas barlaý basqarmasynyń burynǵy ofıseri Sergeı Skrıpal men onyń qyzyna ý berýine baılanysty jasaldy. Máskeý oǵan AQSH-tyń 60 dıplomatyn shyǵaryp, Sankt-Peterbýrgtegi konsýldyqty jabý arqyly jaýap berdi.
Pikir qaldyrý