Búgin Astanada áıel quqyqtaryn qorǵaý jáne genderlik teńdik máselesine qatysty konferensıa ótti, dep habarlaıdy Qamshy.kz aqparat agenttigi.

Shyǵarmashylyq áıelder bastamasy lıgasy Soros-Qazaqstan qorynyń qoldaýymen, QR Prezıdenti janyndaǵy áıel isteri jáne otbasylyq demografıalyq saıasat jónindegi ulttyq komısıanyń qatysýymen «Qazaqstandaǵy áıelder quqyǵy: múmkindikter men kedergiler» atty konferensıa uıymdastyrdy. Jıynda qoǵamdaǵy áıelderdiń róli sóz boldy. Sonymen qatar qoǵamda kóp talqyǵa túsetin genderlik saıasat, turmystyq zorlyq-zombylyq, áıelderdiń saıasatqa aralasýy syndy mańyzdy máseleler aıtyldy.

– Búgingi konferensıanyń maqsaty – áıel quqyǵyn qorǵaýdy ilgeriletýge kedergi keltiretin máselelerdi talqylaý jáne múmkindikterdi keńeıtý. «Áıeldi aıala» atty bir jylǵa sozylatyn kampanıaǵa barshamyz qoldaý kórsetý maqsatynda da osy jıyndy uıymdastyryp otyrmyz, - dedi Soros-Qazaqstan qorynyń ókili Aıda Aıdarqulova.

Onyń aıtýynsha, «Áıeldi aıala» – qazaq tilinde jasalǵan eń alǵashqy jalpyrespýblıkalyq kampanıa eken.

– Ókinishtisi, qazir áıelderdiń quqyǵyn taptap, túrli zorlyq-zombylyqqa ushyratatyn jaǵdaılar kóp bolyp jatyr. Biraq qoǵam retinde osyndaı jaǵdaılarǵa qalaı toqtaý qoıamyz degen máseleler onsha qarastyrylmaıdy. Áıel quqyǵyn shekteý jáne ondaǵy kedergiler máselesin sheshý – tek bıliktiń ǵana mindeti emes, eń birinshi qoǵamnyń mindeti, - dedi Aıda Aıdarqulova.

Konferensıa jumysyna QR Prezıdenti janyndaǵy Áıelder isteri jáne otbasylyq-demografıalyq saıasat jónindegi ulttyq komısıa tóraǵasynyń orynbasary Lázzát Súleımen, QR Ádilet vıse-mınıstri Elvıra Ázimova, ÚEU ókilderi, elimizge tanymal telejýrnalıst Láılá Sultanqyzy, Soros-Qazaqstan qorynyń basqarma tóraǵasy Anton Artemov, quqyq qorǵaýshylar, BAQ ókilderi men qoǵam qaıratkerleri qatysty.

– Elimizde áıelderdiń quqyǵyn júzege asyrýǵa kedergi bolatyn qaýip-qaterler týraly qoǵamnyń basym bóligin tarta otyryp, memlekettik organ ókilderiniń qatysýymen beıresmı, ashyq pikirtalas alańdarynda, forýmdarda barynsha keńinen talqylaý kerek, - deıdi Shyǵarmashylyq áıelder bastamasy lıgasynyń prezıdenti Ásıa Haırýlına.

Konferensıa aıasynda «Kıimdi kinálama», «Uıat» atty kórmeler ótkizildi.

Aıta ketsek, áıel quqyǵyn qorǵaý jónindegi aqparattyq naýqan jyl sońyna deıin sozylady.