Memleket basshysy Nursultan Nazarbaev Ilham Álıevke Ázerbaıjan Respýblıkasynyń Prezıdenti laýazymyna qaıta saılanýyna baılanysty quttyqtaý jedelhatyn joldady, dep habarlaıdy Qamshy.kz aqparat agenttigi Aqordanyń baspasóz qyzmetine silteme jasap. 

Memleket basshysy Qazaqstan halqynyń jáne jeke óziniń atynan Ilham Álıevti Ázerbaıjan Respýblıkasy Prezıdentiniń saılaýyndaǵy aıqyn jeńisimen quttyqtady.

«Ótken saılaýdaǵy jeńisińiz azamattardyń ál-aýqatyn odan ári arttyrýǵa jáne memleketińizdiń halyqaralyq arenadaǵy bedelin nyǵaıtýǵa baǵyttalǵan Sizdiń saıasatyńyzǵa Ázerbaıjan halqynyń kórsetken joǵary qoldaýynyń dáleli bolyp sanalady.

Baýyrlas Ázerbaıjan eliniń órkendeýi jolyndaǵy jaýapty qyzmetińizde jańa tabystarǵa qol jetkizýińizge jáne aldaǵy barlyq josparyńyzdyń sátti iske asyrylýyna tilektespin.

Qazaqstan men Ázerbaıjan arasyndaǵy berik dostyq pen senimge negizdelgen qarym-qatynastardy nyǵaıtýǵa zor úles qosqanyńyzdy da atap ótkim keledi.

Eki el arasynda qalyptasqan strategıalyq yntymaqtastyq halyqtarymyzdyń jarqyn bolashaǵy úshin odan ári qarqyndy damı beretinine kámil senemin», – delingen jedelhatta.

Sońynda Qazaqstan Prezıdenti baýyrlas Ázerbaıjannyń búkil halqyna beıbitshilik pen baq-bereke tiledi.