Pákistanda 24 jastaǵy Samına Samýn esimdi jas ánshini konsert kezinde bıleýden bas tartqany úshin atyp óltirgen. Qaıǵyly jaǵdaıdyń vıdeosyn The Independent basylymy jarıalaǵan dep habarlaıdy Qamshy.kz aqparat agenttigi.
Belgili bolǵandaı, ánshini óltirgen qylmyskerdi polısıa ustaǵan. Kýágerlerdiń sózine qaraǵanda, er adam qyzǵa tapansha taqap, otyryp án aıtýdyń ornyna, turyp bıleýdi talap etken. Samýn orynan turyp án aıtqan, alaıda bıleýden bas tartqan kórinedi. Sol sátte qylmysker ony atyp jibergen.
Oqıǵa pákistandyq Larkana qalasynda bolǵan. Samýn toıǵa shaqyrylǵan ánshi retinde óner kórsetken. Sonymen qosa, ánshiniń aıaǵy aýyr bolǵan eken.
