QR Syrtqy ister mınıstriniń birinshi orynbasary Muhtar Tileýberdi Qytaıdaǵy qazaq dıasporasynyń máselesin talqylaý úshin Úrimjige barady. Bul týraly búgin ol Májilistegi Úkimet saǵatynda aıtty, dep habarlaıdy QazAqparat.
Aıta keterligi, Úkimet saǵaty barysynda Májilis depýtaty Bekbolat Tileýhan Qazaqstanǵa kelip azamattyq ala almaı júrgen qandastarymyzdyń jaǵdaıyn aıtqan bolatyn.
«Rasynda Bekbolat Qanaıuly kótergen másele oryndy. Tarıhı otanyna qaıtamyn degen qazaqtar shetelde kóp. Ózderińiz bilesizder, bizdiń taraptan da qoldan kelgenshe jaǵdaı jasalyp jatyr. Máselen, byltyr Dúnıejúzi qazaqtarynyń quryltaıynda Elbasymyzǵa Qytaıdaǵy qazaqtarǵa qatysty másele aıtyldy. Olarǵa jeńildikpen azamattyq alý kezinde biraz qujattar qıyndyq týdyrady eken. Elbasymyzdyń tapsyrmasy boıynsha İshki ister mınıstrligi sol qujattardan bas tartty, talap etpeıtin boldy», - dedi birinshi vıse-mınıstr.
Degenmen, onyń aıtýyna qaraǵanda, búginde bul másele basqa máselege aınalyp shyǵa kelgen.
«Mysaly Qytaıdan kelgen qazaqtar jeńildikpen azamattyq alady. Odan keıin Qytaı elshiligine baryp tólqujattaryn tapsyratyn. Al Úrimji jaqqa qaıtyp barǵan kezde olar turaqty tirkeýden shyqpaǵandyqtan qamalyp jatyr. Óıtkeni olar turaqty tirkeýden shyqpaǵannan keıin qosymsha áleýmettik tólemder alyp otyr. Jergilikti bılik soǵan tyıym salmaq. Mine osynda máseleler týyndaýda», - dedi ol.
Osy rette vıse-mınıstr shetelden kelgen qandastarymyzdyń azamattyq alýlaryna jeńildik jasaý máselesin jan-jaqty qarastyrý qajettigin basa aıtty.
«Sol eldegi talaptarǵa qaıshy kelmeıtindeı jasaýymyz kerek. Jalpy joǵaryda aıtqan máselege qatysty Qytaı úkimetimen kelissózder ótkizip jatyrmyz. Men erteń Úrimjige saparlamaqpyn. Sol jaqtaǵy qazaq dıasporasy máselesin talqylaý úshin resmı saparmen baramyn», - dedi Muhtar Tileýberdi.
Shetelden kelgen qandastarymyzdyń azamattyq alýyna birqatar jeńildik jasalǵanyn İshki ister mınıstri Qalmuhanbet Qasymov da aıtty.
«Degenmen, oralman mártebesin alǵannan keıin bir jyldyń ishinde bizge aryz berip, azamattyǵyn alýy kerek. Olar kóbine bir jyldyń ishinde júginbeıdi, 15-17 aıdan keıin aryz beredi. Sondyqtan biz olardy qaıtaramyz. Qazir biz zańǵa ózgerister engizeıin dep jatyrmyz. Sonda aryz berý merzimin uzartyp, jeńildik jasaıtyn bolamyz», - dedi Qalmuhanbet Qasymov.
