Belsendi Talǵat Aıannyń (Aıanov) jazasy jeńildetildi, - dep habarlaıdy Tengrinews.kz. Aqtóbe qalalyq № 2 soty Talǵat Aıanovtyń bas bostandyǵynan aıyrý úkiminiń ótelmegen jazasyn bas bostandyǵyn shekteý jazasyna almastyrý aryzyn qarastyrdy. 

"Sotqa aryz berilgen 2018 jyly 15 naýryzda T.T. Aıanov QR Qylmystyq kodeksiniń 73-baby 2-bóligi boıynsha kesilgen jazanyń úshten bir bóligin ótegen. Tártibi durys, jazasyn óteý barysynda bekitilgen tártipti buzbaǵan, tártiptik sharalarǵa tartylmaǵan, qaıta jaqsy jaqtarymen kóringen tustary bolǵan. Ol eńbek pen ótkizilgen sharalarǵa belsendi túrde qatynasqan, tártibi birinshi deńgeıli jaqsy degen baǵa berligen, jazasyn óteý jeńildetilgen shart boıynsha ótegen. Aqtóbe qalalyq № 2 soty 2018 jyly 13 sáýirde sottalýshynyń aryzyn qanaǵattandyrdy", - delingen sot baspasóz qyzmetiniń habarlamasynda. 

Sot málimetinshe, Talǵat Aıannyń ótelmegen merzimi (úsh jyl bir aı jáne 16 kún) bas bostandyǵy shektelý jazasyna aýystyrylyp, probasıonaldyq baqylaýda bolady. 

2016 jyly Atyraý qalalyq № 2 soty Talǵat Aıandy QR Qylmystyq kodeksiniń birneshe baptary boıynsha "Áleýmettik, ulttyq, rýlyq, násildik, tektik-toptyq nemese dinı alaýyzdyqty qozdyrý", "Kórineý jalǵan aqparat taratý" jáne "Zańsyz jınalys, mıtıń, sherý, pıket, demonstrasıa nemese ózge de zańsyz jarıa is-shara uıymdastyrý, ótkizý ne olarǵa qatysý, sol sıaqty úı-jaı, baılanys quraldaryn, jabdyqtar, kólik berý arqyly osyndaı is-sharalardy uıymdastyrýǵa nemese ótkizýge járdem kórsetý, eger bul is-áreketter azamattardyń nemese uıymdardyń quqyqtary men zańdy múddelerine ne qoǵamnyń nemese memlekettiń zańmen qorǵalatyn múddelerine eleýli zıan keltirý" boıynsha sottalǵan. 

Talǵat Aıan men taǵy bir belsendi Maks Boqaev jalpy rejımdegi kolonıada óteýge bes jylǵa sottalǵan.