Oral qalasynyń ákimi Murat Muqaev jer qatynastary salasynda kórsetiletin memlekettik qyzmetterdi  sıfrlandyrý jaıyn óńirlik komýnıkasıalar qyzmetiniń alańynda ótken brıfıńte baıandady.

          Aıta ketsek, Oral qalasynyń aýmaǵy 73,1 myń gektardy quraıdy. Sonyń ishinde eldi meken jeri – 10,9 myń ga, ónerkásip, tranport sanatyndaǵy jer – 2,5 myń ga, aýyl sharýashylyǵy maqsatyndaǵy jer – 48,9 myń ga, al qor jeri – 3,9 myń gektar. Murat Rahmetuly jeke turǵyn úı úshin jer telimderin berý kún tártibindegi ózekti máselelerdiń biri ekendigin basa aıtty. Búgingi tańda Oral qalasynda 71 426 adam jer telimi kezeginde tur. Shahar basshysynyń aıtýynsha, daıyndalǵan alańdardyń bolmaýyna baılanysty jeke turǵyn úı qurylysy úshin jer telimderin berý jumystary 2012 jyldan qazirgi kezge deıin toqtap tur. Jeke turǵyn úı qurylysy úshin jer telimderin berý sońǵy ret 2010-2012 jyldary júrgizilip, sol ýaqyt aralyǵynda ázirlengen túpkilikti jobalaý josparyna sáıkes Derkól kentinen berilgen. Osylaısha 2000-2012 jyldar aralyǵynda 15 myńǵa jýyq azamatqa jalpy kólemi 1 496,72 ga jer telimi berilip, Oral qalasynda PDP-2, PDP-3A, «Soltústik-SHyǵys», «Juldyz», «Balaýsa», «Bolashaq», «Arman», «Kóktem», «Keń dala» jáne «Sary taý» shaǵynaýdandary boı kótergeni belgili. 2004 jyldan beri jer kezeginde turǵan oraldyqtar tıesili jer telimin alar kúndi asyǵa kútip júr. – «Nurly jer» baǵdarlamasyn iske asyrýdyń birinshi kezeńi 2017-2021 jyldardy qamtıdy. Qazir Krýgloozernyı aýyldyq okrýgi aýmaǵynda túpkilikti jobalaý josparyna sáıkes 1145 jer telimin daıyndaý kózdelip otyr. Alaıda jer telimin berý jol, tabıǵı gaz, aýyz sý, elektr jelisi sıaqty ınjenerlik ınfraqurylymdar tartylyp, mektep, balabaqsha, emhana sıaqty áleýmettik nysandar qurylysy aıaqtalǵan soń ǵana bastalady. Úkimettiń talaby solaı. Infraqurylymdar men áleýmettik nysandardyń qurylysyn 2019 jyldyń alǵashqy jartyjyldyǵynda bastaýdy kózdep otyrmyz, – dedi Murat Rahmetuly.

QR Jer kodeksiniń 48-babyna sáıkes aýyl sharýashylyǵy maqsatyndaǵy jáne komersıalyq baǵyttaǵy jer ýchaskeleri konkýrstar men aýksıondar arqyly beriledi. Búginge deıin Oral qalasynda aýksıonmen 17 komersıalyq baǵyttaǵy jer telimi berilse, sáýir aıynda 10 jer teliminiń jaldaý quqyǵyn satý jóninde aýksıon ótkizilmek. – Oral qalasynyń aýmaǵynda 165 baý-baqsha seriktestigi ornalasqan. Turǵyndardyń deni zań talaptaryn jetik bilmegendikten, ózderiniń jer telimderin zańdastyrmaǵan Ruqsat beretin qujattary bolmasa da, jer telimderin maqsatty paıdalanyp otyr. 2016 jyldyń 6 mamyryndaǵy «Jer zańdylyǵynyń jekelegen normalaryn qoldanýǵa moratorıı engizý týraly» Jarlyqqa baılanysty biz aýyl sharýashylyǵy maqsatyndaǵy jerlerdi jeke menshikke bere almaımyz. Moratorıı 2021 jyldyń 31 jeltoqsanyna deıin kúshinde bolady, – dedi qala ákimi.

Ótken jyldyń sońynda oblys ákimi Altaı Kólginovtiń bastamasymen jer telimderin tańdaý aktisin kelisý úrdisi tolyq avtomattandyryldy. Endi qujat rásimdeý tolyǵymen avtomatty rejimde júrgiziledi. Nátıjesinde qyzmetti alý merzimi 2-3 aıdan 5-10 kúnge deıin qysqardy. Qazirgi tańda atalmysh jobaǵa 19 mekemeuıym tartyldy. Sonymen qatar «Qoljetimdi ákimdik» jobasy aıasynda azamattarǵa 16 memlekettik qyzmet túri kórsetilýde. Operasıalyq zal ashylǵan kúnnen bastap 40364 adamǵa qyzmet kórsetilgen. Ortasha eseppen kúnine 300-ge jýyq qala turǵyny keledi. Qyzmet kórsetý deńgeıin arttyrý transporentti júıeni qalyptastyrý, kórsetiletin memlekettik qyzmettiń ashyqtyǵyn jetildirý basty nazarda, – dep atap ótti Murat Muqaev.