Almatyda osymen jetinshi ret halyqaralyq marafon ótti. Bıyl sporttyq sharaǵa qatysýǵa resmı túrde 14 myń adam tirkeldi. Biraq 16 myńdaı almatylyq buqaralyq sport dodasyna qatysqan jaqyndaryna qoldaý bildirýge kelgen. Qatysýshylarǵa berilgen eń uzyn dıstansıa 42 shaqyrym boldy. Qashyqty alǵashqy eńsergen 3 jelaıaq qarjylaı syılyqqa ıe boldy. Respýblıka alańynan bastalyp, dál sol jerde aıaqtalǵan marafon jaıly kelesi beınematerıalda.

Salaýatty ómir saltyn ustanatyndar jeksenbiniń tańynda Almatydaǵy Respýblıka saraıynyń aldyna jınaldy. Uıymdastyrýshylar marafonda qatysýshylardyń tańdaýyna qaraı 10, 21 jáne 42 kılometrge júgirýdi, al balalar úshin 3 kılometr qashyqtyqty usyndy. Kóterińki kóńil-kúıde kelgen qala qonaqtary men turǵyndaryna Almaty ákimi Baýyrjan Baıbek sáttilik tiledi.

«Almaty qalasynda biz sportshylar úshin, qala turǵyndary úshin qolaıly jaǵdaı jasap otyrmyz sportpen shuǵyldanýǵa. Elbasy aıtqandaı, bizdiń ultymyzdyń densaýlyǵy - bizdiń tabysty bolashaǵymyzdyń kepili, negizi. Sondyqtan sportpen aınalysqan azamattar, árıne. Eń bastysy ózderiniń densaýlyǵy úshin jumys isteıdi. Sondyqtan búgin uıymdastyrýshylardy, qoldaýshylardy, barsha qonaqtarymyzdy osy is-sharamen shyn júrekten quttyqtaımyn», - dedi Almaty qalasynyń ákimi Baýyrjan BAIBEK.

Sondaı-aq qala basshysy Alyp shaharda buqaralyq sport túrleriniń damýyna basa nazar aýdarylyp kele jatqanyn jetkizdi. Máselen, Almatyda kóptep velojolaqtar men júrginshiler joly salynýda. Al álemdegi qaıyrymdylyq maqsattaǵy 5 iri jarystyń qataryna engen sharaǵa bul joly Evropadan, Azıadan, tipti Soltústik Amerıkadan jáne Avstralıadan da qatysýshylar kelgen. Marafonǵa startty qala ákimi Baýyrjan Baıbek berdi.

Belgilengen núktelerde dárigerler, qutqarýshylar men tártip saqshylary kezekshilik etti. Oǵan qosa, sý ishetin pýnktter ornatylǵan. Marafonǵa qatysqandardy jankúıerler qoldady. Al sportshylardyń kóńil-kúıi kóterińki.

Bıyl jarys baǵyty ózgerip, marafon Respýblıka alańynan bastalyp, dál osy jerde aıaqtaldy. Qatysýshylardyń barlyǵy nátıjesine qaramastan estelik medaldarǵa ıe boldy. Aıta keteıik, 42 shaqyrymdy 2 saǵat 33 mınýtta eńsergen almatylyq Mıhaıl Krasılov bas júldeni, ıaǵnı 400 myń teńgeni qanjyǵasyna baılady. Ekinshi oryn úshin 350 myń, úshinshige 250 myń teńge júlde taǵaıyndaldy. Jalpy marafonnan túsken qarjy qaıyrymdylyqqa jumsalady.