Elbasymyz Nursultan Ábishuly Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda «Nurly jol-bolashaqqa bastar jol» oblystyq óner festıvali Shardara qalasynda ótti, dep habarlaıdy Qamshy.kz aqparat agenttigi.

Shara «Mádenı mura» baǵdarlamasy aıasynda Uzyn ata kesenesine zıarat jasap, tarıhymen tanysýdan bastaldy. XIV-XV ǵasyrlarǵa tán tarıhı nysan Qazaqstannyń kıeli jerleri tizimine engen.

«Dinı ilimdi jalǵastyrýshy, elge izgilik pen adaldyqtyń nuryn sebýshi ustazdyq, áýlıelik qasıetimen ańyzǵa aınalǵan Uzyn ata dańqyna bas ıip, arnaıy quran baǵyshtap kelýshilerdiń qarasy mol», - dedi «Shejireli Shardara» aýdandyq ólketaný murajaıy dırektorynyń orynbasary N.Seıdýllaev.

Kesene aýmaǵyn abattandyrý jumystary da erekshe qolǵa alynǵan.

Festıvál Shardara qalasyndaǵy Abaı alańynda joǵarǵy jáne orta arnaýly oqý oryndaryndaǵy qolóner sheberleriniń úıirmesi men kitap kórmesi, «Bolashaqqa baǵdar: rýhanı jańǵyrý» fleshmobymen jalǵasyp, Abaı eskertkishine gúl shoqtary qoıyldy.

Sonymen qatar, Shardara aýdandyq mádenıet jáne tilderdi damytý bólimine qarasty 9 aýyldyq mádenıet úıiniń meńgerýshileri atqarǵan jumystary men aldaǵy jospary, halyqpen mádenı baılanysy jóninde esep berip, aqsaqaldy qarıalar men aq jaýlyqty analardyń qatysýymen «Saýmalyq» jáne bata berý salt-dástúrlerin kórsetti.

Buǵan qosa, 80-ge jýyq týyndylary týǵan jer men tabıǵat, tarıhı sátteri túrli-tústi boıaýlarmen  syr shertken qylqalam sheberi Aıdarbekov Temiráli Óserulynyń «Rýhanı jańǵyrý» atty týyndylar buryshtamasy da óz ereksheligin baıqatty.

Aýdandaǵy mádenıet úıleri men klýb úıirmeleri ónerpazdarynyń gala-konsertinde halyq shyǵarmashylyǵynyń án, bı, kúı, hor, sırk, drama syndy 18 janrynan óner kórsetken shardaralyqtardyń Mádenı kúni baspasóz konferensıasymen qorytyndylandy.

Aıta ketsek, Shardara aýdanyndaǵy mádenıet úılerinen ashylǵan 46 úıirmede 1400-deı qatysýshy dáris alsa, olardyń ishinde 30-40 jas aralyǵyndaǵy qatysýshylar da bar.