Batys Qazaqstan oblysynda turǵyndardy baspanamen qamtý máselesi josparly júzege asýda. Osy oraıda «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» Joldaýynyń besinshi baǵytynda qurylysqa jáne komýnaldyq sektorǵa zamanaýı tehnologıalardy engizý qajettigi qarastyrylǵan edi. Ótken jyly óńirde 392,2 myń sharshy metr turǵyn úı qoldanysqa berildi. Al bıyl 304,0 myń sharshy metr turǵyn úıdiń qurylysyn aıaqtap, tapsyrý josparlanyp otyr.
-Batys Qazaqstan oblysy boıynsha byltyr turǵyn úı qurylysy Bórli aýdanynda qarqyndy júrgizilip, onyń aýmaǵy 48 374 myń sharshy metrdi qurady. Zelenov aýdanynda 18 658 myń sharshy metr, Terekti aýdanynda 16 605 myń sharshy metrdi qurasa, Oral qalasynda 269 139 myń sharshy metr baspana salyndy. Sonymen qatar ótken jyly aýyldyq eldi mekenderde 113 turǵyn úıdiń qurylysy aıaqtalǵan bolatyn. Máselen, Aqjaıyq aýdanynda 6, Bókeı ordasy aýdanynda 10, Qaztalov aýdanynda 22, Syrym aýdanynda 24 jáne Shyńǵyrlaý aýdanynda 35 úı boı kóterdi. Aǵymdaǵy jyly Jánibek, Terekti, Qaratóbe, Bókeı ordasy jáne Jańaqala aýdandarynda jaldamaly-kommýnaldyq turǵyn úılerdiń qurylysy júrgizilýde.Oblysymyzda moınyna alǵan mindetin minsiz atqaryp, senimdi aqtap júrgen qurylys kompanıalary qatarynda «Áltaır», «SKF Otdelstroı », «KCG», «Bolashaq-T», «PMK-117», «Jıenbaı»,«Ýralskvodstroı» syndy JSHS-lar jáne «Domostroıtel» ÓQ bar. Al salynyp jatqan nysannyń qurylys sapasyn tehnıkalyq qadaǵalaý men avtorlyq qadaǵalaýdy oblystyq memlekettik sáýlet-qurylys baqylaýy basqarmasy júrgizedi,- deıdi Batys Qazaqstan oblystyq qurylys basqarmasynyń basshysy Arman Óksikbaev.
QR Úkimetiniń 2010 jylǵy 30 qyrkúıektegi №1004 qaýlysy negizinde Oral qalasynda «SV plús» jáne «Bolashaq-T» JSHS-lar úı qurylysy kombınattaryn quryp, jumysyn bastaǵan bolatyn. Soǵan oraı qazir úıler joǵary sapada salynyp, qurylys merzimi qysqarýda. Sonymen qatar qurylysqa jergilikti ónimder qoldanylady. Ótken jyly «Nurly jer» baǵdarlamasy sheńberinde tórt paneldi úı qoldanysqa berildi jáne kirpishpen tolyqtyrylǵan úsh karkastyq-monolıttik úı boı kóterdi. Sonymen birge kirpish úıler de turǵyzylýda. Atalmysh eki úı qurylysy kombınatynyń jáne kirpish zaýytynyń ónimderine degen suranys joǵary.
Áleýmettik nysandardyń da salyný qarqy jaqsy. Máselen, ótken jyly oblys boıynsha «Nurly jol» memlekettik baǵdarlamasyn júzege asyrý sheńberinde Ulttyq qor qarajaty esebinen eki bilim berý nysanynyń qurylysy aıaqtaldy. Olardyń biri Derkól kentindegi 600 oqýshyǵa arnalǵan mektep bolsa, ekinshisi, Oral qalasyndaǵy 300 balany qamtıtyn №4 orta jalpy bilim beretin mektep. Sonymen qatar jergilikti búdjet esebinen Qaztalov aýdanynyń ortalyǵynda 100 oryndyq mektep-ınternaty, Jánibektegi Aqoba aýylyndaǵy orta mektepke japsarlas sport zal salyndy.
Sondaı-aq Terekti aýdanyndaǵy Podstepnyı aýylynda 300 oryndyq mádenıet úıi, Zelenov aýdanyna qarasty Kalının aýylynda 160 kelýshige arnalǵan dene shynyqtyrý-saýyqtyrý kesheni, Bórli aýdanyndaǵy Keńtúbek aýylynda feldsherlik-akýsherlik pýnkt pen Ýspende medısınalyq pýnkt boı kóterdi. Bul nysandardyń ıgiligin halyq kórip, el ekonomıkasynyń qarqyndy damýyna úles qosary sózsiz.
