Maýsym aıynda Qazaqstan men Qytaı basshylary kezdesedi. Bul týraly búgin Qytaı Halyq Respýblıkasynyń Qazaqstandaǵy Tótenshe jáne Ókiletti elshisi Chjan Hanxýeı málimdedi.
"Bıyl biz birqatar mańyzdy oqıǵalarǵa kýá bolamyz. Menińshe, eń basty oqıǵa, ol - eki prezıdentimizdiń Qytaıdaǵy kezdesýi. Atalǵan kezdesý maýsym aıynda bolady. Budan bólek, Qazaqstan basshylyǵynyń basqa da ókilderin kútip otyrmyz. Olardyń ishinde Premer-Mınıtsr Baqytjan Saǵyntaev myrza, onyń orynbasary Asqar Mamın da bar. Bunyń barlyǵy Qazaqstan men Qytaı arasyndaǵy tyǵyz qarym-qatynastyń joǵary dárejede ekenin kórsetse kerek", - dep keltirdi Qazaqparat Ch.Hanxýeıdyń aıtqanyn.
Elshiniń aıtýynsha, eki eldiń "Bir jol, bir beldeý" bastamasy aıasyndaǵy yntymaqtastyǵy, sondaı-aq, "Nurly jol" memlekettik baǵdarlamasyn atalǵan bastamamen sheber úndestire bilýdiń arqasynda biraz jetistikterge jetýge bolady.
"Qazaqstan men Qytaıdyń yntymaqtastyǵy osy eki elge ǵana emes, jalpy aımaqtaǵy ózara áriptestik pen qaýipsizdiktiń damýyna oń yqpalyn tıgize alady. Halyqtardyń ál-aýqaty artady", - dep atap kórsetti Ch.Hanxýeı.
Nazarbaev 6-10 maýsym kúnderi Qytaıdyń Sındao qalasynda ótetin Shanhaı yntymaqtastyq uıymy (SHYU) memleket basshylarynyń kezekti kezdesýine qatysady. Kezdesýge Reseı prezıdenti Vladımır Pýtın, Qyrǵyzstan prezıdenti Sooronbaı Jeenbekov de qatysady dep josparlanǵan.
Lý Kangtiń aıtýynsha, Iran prezıdenti Hassan Roýhanı jıynǵa baqylaýshy retinde qatysady.
Sapar aıasynda el erteńi úshin mańyzy zor kelissózder júrgizip, qundy qujattarǵa qol qoıady dep josparlanǵan. Jalpy, Shıńdao samıtinde uzyn-yrǵasy 60-qa jýyq shara ótpek. Olardyń ishinen tuńǵysh ret ótkeli otyrǵan İsker áıelder forýmy men BAQ ókilderiniń forýmyn erekshe ataýǵa turady.
SHYU 2001 jyly Shanhaıda Qazaqstan, Qyrǵyzstan, Qytaı, Reseı jáne Tájikstannyń bastamasymen qurylǵan. 2017 jyly maýsymda Astanada ótken SHYU samıtinde uıymǵa Úndistan men Pákistan qosylǵan. Iran da uıymǵa turaqty múshe bolyp qosylýǵa nıetti.
Shanhaı yntymaqtastyq uıymy elderi basshylarynyń sońǵy samıty ótken jyly "EXPO" kórmesiniń ashylýyna oraı Astanada 8-9 maýsym kúnderi ótken bolaty.
