Sırıa Prezıdenti Bashar Asad jaqyn arada Donald Tramppen kezdesýi múmkin ekenin aıtty.

«Kez kelgen kezdesý nátıje berýge tıis, biraq Tramp sekildi turaqsyz saıasatkermen qandaı mejege jetýge bolatyny belgisiz», - deıdi Sırıa kóshbasshysy.

Ózin «haıýan» dep balaǵattaǵan AQSH prezıdentine jaýap bergen Asad «mundaı málimdeme amerıkandyq mádenıetke saı ma eken?»,- dep qyzyǵýshylyq tanytty. «Álemde mundaı balaǵat sózderdi qoldanatyn qoǵam baryna kúmánmen qaraımyn»,- dedi arab eliniń basshysy.

Asad ózine aıtylǵan mundaı balaǵat sózderge tek saıasatker retinde nazar aýdaratynyn, al óz basyna munyń eshbir áseri joq ekenin ańǵartty. «Qazir meniń elimde bolyp jatqan soǵys pen terrorıster týraly pikirler ǵana mańyzdy», - deıdi Asad.

Eske sala keteıik, Donald Tramp sáýir aıynda óziniń Tvıtter paraqshasynda: «Pýtın, Reseı jáne Iran haıýan Asadty qoldaǵandary úshin jaýapty», - dep jazǵan bolatyn. Kreml Sırıa prezıdentine baǵyttalǵan bul málimdemege «ádepsizdik pen namysqa tıý» dep baǵa berdi.