QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń jemqorlyqqa qarsy kúres ulttyq búrosynda Atyraý oblysynyń burynǵy ákimi Bergeı Rysqalıev qurǵan uıymdasqan qylmystyq toptyń isi boıynsha sotqa deıingi tergeý amaldary aıaqtalyp, is materıaldarymen tanysý bastaldy,  dep habarlaıdy Qamshy.kz aqparat agenttigi vedomstvonyń baspasóz qyzmetine silteme jasap.

«Sotqa deıingi tergeý barysynda Bergeı Rysqalıev pen shetelde júrgen jaqtastarynyń jasaǵan qylmystaryn dáleldeıtin jetkilikti aıǵaqtar tabyldy»,- delingen habarlamada.

Aıta keterlik jáıt, aǵymdaǵy jyldyń 24 aqpanynda Ulttyq búro BAQ-ta «Kúdikti Rysqalıev, Rysqalı, Álbaqasov, Jeldibaev, İzbasar, Súleımenov, Jolmaǵambetov, Temiralın jáne Danevıch  tergeý sharasyn ótkizý úshin 2018 jyldyń 2 naýryzy saǵat 10.00-ge deıin, Qazaqstan Respýblıkasy, Astana qalasy, Seıfýllın kóshesi, 37 mekenjaıynda ornalasqan Sybaılas jemqorlyqqa qarsy is-qımyl ulttyq búrosynyń ákimshilik ǵımaratyna kelýi tıis» - degen habarlama taratqan bolatyn.

"Uıymdasqan qylmystyq topty quryp, oǵan jetekshilik etý nemese oǵan qatysý", "Qyzmettik jalǵandyq", "Laýazymdyq ókilettikti asyra paıdalaný", "Ózgeniń senip tapsyrylǵan múlkin ıemdený men talan-tarajǵa salý", "Zańsyz jolmen tabylǵan aqsha men ózge de múlikti zańdastyrý", "Jalǵan kásipkerlik" syndy qylmystyq kodekstiń alty baby boıynsha sottalǵan 22 adamnyń barlyǵy jeke uıym basshylary, ákimniń burynǵy orynbasarlary men laýazymdy tulǵalar bolatyn.

Bergeı Rysqalıev Atyraý oblysynyń basshysy bolǵan kezde memlekettiń asa iri kólemdegi qarajatyn birneshe ret jymqyryp, jemqorlyq qylmystaryn jasaǵan. Qylmystyq áreketterdiń saldarynan memleketke 70 mıllıard teńgeden astam shyǵyn keldi.