Qytaı tóraǵasy Sı Szınpın 12 maýsymda Sıngapýrda AQSH prezıdenti  Donald Tramppen jáne Soltústik Koreıa basshysy Kım Chen Ynmen Amerıka-Soltústik Koreıa samıtinde kezdesýi múmkin. Bul týraly Ońtústik Koreıanyń aqparat quraldary habar tartqan.

Ondaı jaǵdaıda Koreı túbegi soǵysyn aıaqtap, 1953 jyly beıbitshilik kelisim shartyna qol qoıǵan elder basshylary alǵash ret qaıta kezdesken bolady. Kezdesý aıasynda tolyqtaı beıbit kelisim qarastyrylýy múmkin. 27 sáýirdegi eki Koreıa arasyndaǵy joǵarǵy deńgeıli kezdesýde «Koreı jarty araldaryn biriktirý jáne beıbit gúldendirý týraly Panmunjom deklarasıasynyń» 3 bap, 3 tarmaǵynda beıbitshilik kelisimine 65 jyl tolǵanda Ońtústik pen Soltústik Koreıa Koreı soǵysy aıaqtalǵanyn jarıalaıtyny aıtylǵan. Qazirgi ýaqytta eki el arasy tehnıkalyq turǵyda áli de soǵys jaǵdaıynda.

Aıta ketsek, Tramp beısenbi kúni Kım Chen Ynmen kezdesýi 12 maýsymda ótetinin málimdegen bolatyn. Aqúıdiń Ulttyq qaýipsizdik keńes jónindegi keńesshisiniń aıtýynsha atalǵan lokasıa Sıngapýrdyń beıtaraptylyǵy men kelissózdiń qaýipsizdigi úshin tańdap alynǵan.

Eske salsaq, Kım Chen Yn áıeli Lı Sol Chjýdy ertip 25-28 naýryzda óziniń shetelge alǵashqy saparyn jasap Beıjińge kelip ketken. Al, 7-8 mamyrda Qytaıdyń soltústik-shyǵysyndaǵy Dalán qalasynda taǵy da Sı Sınpınmen kezdesý jasady.