Budan bylaı «Nur Otan» partıasy mektep asqanalarynyń jumysyn jetildirýdi úsh baǵyt boıynsha júrgizbek. Bul týraly partıa Tóraǵasynyń Birinshi orynbasary málimdedi. Búgin Máýlen Áshimbaev Astana qalasyndaǵy №15 mektep-lıseıge arnaıy baryp, atalǵan baǵyttaǵy partıalyq jobanyń júzege asyrylý barysymen tanysty.

Mektep asqanasynyń jumysymen tanysqan Máýlen Áshimbaev elimizde osy salada keıbir keleńsizdikter bar ekenin aıtty. Onyń sózine qaraǵanda, keıbir oqý oryndarynda tıisti talaptar saqtala bermeıdi. Iaǵnı, as mázirinen bastap, onyń quramy, qyzmet sapasy, tazalyq sıaqty negizgi baǵyttarda aıtarlyqtaı olqylyqtar bar. Sondyqtan barlyq mektepterge ortaq biryńǵaı standart daıyndap, asqana jumysyn sol talaptarǵa saı júrgizýdiń bereri mol bolmaq. Ol normalardy daıyndaý úshin ǵalymdardy, bilikti, kásibı mamandardy jáne tıisti memlekettik organdardy jumyldyrýdyń da mańyzy zor ekeni anyq.

Sonymen qatar partıa Tóraǵasynyń Birinshi orynbasary búginde mektep asqanalarynda kóbine unnan jasalǵan, tátti, qýyrylǵan jáne maıly taǵamdar qoldanylatynyn aıtty. Odan bólek, ol mektep asqanasyn jalǵa alyp otyrǵan kásipkerlerdiń kelesi jyly da sol jerde jumys isteıtinine eshqandaı kepildik joq ekenine nazar aýdardy. Sonyń saldarynan olar jańa qondyrǵylar alyp, qyzmet sapasyn jaqsartýǵa qulyqsyz bolyp otyr. Eger uzaqmerzimdi kelisimmen jumys isteıtin bolsa bul jaǵdaıdyń oń baǵytta ózgeretinine toqtalǵan Máýlen Áshimbaev osy saladaǵy atqarylar jumystardyń basym baǵyttaryn aıqyndap berdi.

– Birinshiden, mektep pen bıznes qaýymdastyqtyń uzaqmerzimdi yntymaqtastyǵyn qalyptastyrýdyń tıimdi tetigin tabýymyz kerek. Ekinshiden, elimiz boıynsha barlyq mektepterge arnalǵan mindetti, naqty, biryńǵaı bazalyq standart qalyptasyp, asqana jumysy júıelenýi tıis. Úshinshiden, osy jumystardyń barlyǵyna turaqty ári júıeli qoǵamdyq baqylaý júrgizýdiń bereri mol bolmaq. Bul ıgi iske partıadan bólek, jaýapty mınıstrlikter, ata-analar komıteti jáne bilikti mamandar belsene qatysýy tıis, – dedi Máýlen Áshimbaev.

Sondaı-aq Máýlen Áshimbaev elordadaǵy №73 mektep-lıseıde de bolyp, ondaǵy İT-synyptyń jumys barysyn baqylap qaıtty. Bul synyptyń partıanyń «tegin 1000 İT-synyp» jobasy aıasynda ashylǵanyn atap ótken jón. Munda balalar baǵdarlamalaý men robot tehnıkalarynyń negizderin úırenedi. Óz sózinde Máýlen Áshimbaev qazirgi tańda elimizde dál osy salalarda maman tapshy ekenin aıtyp, bul bastamanyń bereri mol ekenine toqtaldy.

Aıta keteıik, «Nur Otan» partıasy partıa qyzmetin jańǵyrtý aıasynda 20-dan astam jańa jobany júzege asyrýda. Olardyń qatarynda sıfrlandyrý úderisine úles qosý, shaǵyn jáne orta bıznesti qoldaý jáne «Rýhanı jańǵyrý» baǵdarlamasyn júzege asyrýǵa baǵyttalǵan partıalyq jobalar bar.