Búgin Almatyda «Evolúsıanyń 15 jyly: qubylmaly dúnıe jáne ózgeric ákelgen álem» taqyrybyndaǵy XV Eýrazıa medıa forýmynyń ekinshi kúninde EAMF Uıymdastyrý komıtetiniń tóraıymy Darıǵa Nazarbaeva alǵysózin aıtty, dep habarlaıdy Qamshy.kz aqparat agenttigi.

«15 jyl buryn osy qalada, osy zalda alǵashqy medıaforýmdy ótkizdik. Onyń ótkenine qansha ýaqyt boldy, biraq keshe ǵana sıaqty. Sol kezde týǵan balalar qazir joǵary synypta oqıdy. Sol kezde 50 jasyn toılaǵan adamdar qazir zeınetker bolyp otyr.  Shaqyrýdy qabyl alyp, áriptesterińizge tájirıbemen, ıdeıamen bóliskenderińiz úshin bárińizge alǵysymdy bildiremin. Biz forýmǵa kelgen álemge áıgili spıkerlerdi, moderatorlardy maqtan etemiz», - dedi ol forýmnyń ashylý saltanatynda.

 «2002 jyly alǵash ret Almatyda jınalǵan kezde buryn «aıfon», «aıpad», «feısbýk», «ınstagram» bolmady. Bul zattar qazir ómirimizge enip, álemdi ózine qaratty. «Peıdjer» sózi umyt boldy. Dısk telefondy eski kınolardan ǵana kóremiz. Teledıdar jáshigi suıyq krıstal ekranǵa aınaldy. Noýtbýk túrleri kózdiń jaýyn alady. Smartfon adamdardyń qaltasynda júretin jeke kompúterine aınaldy. Búginde Internette izdeý júıeleri kez kelgen aqparatqa jol ashady. Buryn balalar qýyrshaqpen oınasa qazir devaıs ustaıdy. Álemde medıany tutyný ózgerdi, eń bastysy jańa medıashyndyqta ózin sýda júzgen balyqtaı sezinetin urpaq paıda boldy. Olardy qazir alǵashqy sıfrlyq býyn dep te ataıdy», - dedi Nazarbaeva EAMF ashylý rásiminde.

Sonymen qatar, Darıǵa Nazarbaeva ınternettiń paıda bolýy men sıfrlyq damýdyń teris jaqtaryn da atap ótti.

«Internetke degen qoljetimdilik  talantty adamdarǵa ǵana emes, avantúrıserge, qylmyskerlerge, propagandashylarǵa, terorızm teoretıkteri men praktıkterine de óz oıyn júzege asyrýǵa múmkindik beredi», - dedi ol.