Fransıa prezıdenti Emmanýel Makron men Reseı prezıdenti Vladımır Pýtın Peterbýrg halyqaralyq ekonomıkalyq forýmy aıasynda kelissózder júrgizdi. Kezdesý barysynda basshylar kıberqylmyspen kúres jáne Ýkraınanyń ońtústik shyǵysyndaǵy janjaldy retteý jónindegi Mınsk kelisimin talqylady.

Buǵan qosa Reseıde túrmede otyrǵan ýkraınalyq rejıser Oleg Sensov pen úı qamaqta otyrǵan reseılik rejıser Kırıll Serebránnıkovtyń isi sóz boldy.

«Kelissózder barysynda biz adam quqyqtary jóninde sóz qozǵap, ózekti máselelerdi talqyladyó. Sensov myrza da bar... Prezıdentke bul eki máseleniń bizdiń el úshin mańyzdy ekenin jetkizdim. Men bul memlekettiń ádilet júıesine jaýap bere almaımyn, biraq ashyq jáne shynaıy dıalog ótkizýge múmkindik  mol», - dedi Makron kezdesý aıaqtalǵan soń.

Oleg Sensov jaıly suraq qoıǵan fransýz jýrnalısine Pýtın jaýap berdi. Prezıdenttiń aıtýynsha, ýkraınalyq rejıser Sensov «terakt áreketterin uıymdastyrmaq» bolǵany úshin Reseıde 20 jylǵa qamalǵan.

3 saǵatqa jýyq sozylǵan kezdesý barysynda AQSH-tyń Iran ıadrolyq kelisiminen shyǵýy sóz boldy. Makron Tegerannyń óz mindetterin kelisim aıasynda oryndaýy úshin jaǵdaı jasaý kerek ekenin eskertti. Fransýz basshysynyń sózinshe, AQSH tarapynan tóngen sanksıalarǵa qaramastan Eýropa elderi Irandaǵy kompanıalarynyń jumysyn jalǵastyrý úshin árekettenýleri kerek. Kelissózdegi ózekti taqyryptardyń biri – Sırıa. Makron Sırıadaǵy qaqtyǵysty sheshýde óńirlik derjavalardyń bári atsalysý kerek ekenin aıtty.

Kelissózder sońynda memleketter arasynda yntymaqtastyq, seriktestik qujattaryna qol qoıyldy.