Almatylyq dárigerler bas-mı tamyrlarynyń patologıasyna biregeı ota jasady. Sonyń arqasynda basyndaǵy isikpen 20 jyldaı arpalysqan azamat qulan taza aıyqty. Mıǵa tikeleı baılanysty aýrýdy aýyzdyqtaý úshin hırýrgter kúrdeli operasıany eki kezeńge bólip jasaǵan.

Erbolat Erekeshovtyń shekesine osydan 20 jyl buryn isik shyǵyp, belgisiz dert boıyn dendepti. Únemi basy aýyryp, qulaǵynan shý ketpegen soń ol talaı dárigerdiń aldyna barǵan. Tipti, ota jasatyp, aýrýdy aýyzdyqtaýǵa tyrysypty. Biraq keseli kún sanap asqyna túsken. Al basyndaǵy isik sońǵy jyldary múıizdeı úlkeıip, tipti, elge qaraýǵa da qymsynatyn.

«Aýrý 95 jyly paıda boldy basymda. Semeı qalasynda turǵanmyn ol kezde. Sodan 4 jyldyń ishinde ósip shyqty kádimgi úlken bolyp. Eshkim kómektese almady. Men Qytaıǵa bardym 2012 jyly. Ol jaqtan kórip, analız, dıagnoz jasady. Olar garantıa bermeımiz dedi. Bas aınalý bolǵan, kózim qaraýytyp ketý degen sıaqty nárseler bolǵan»,- dedi Erbolat Erekeshov.

Dárigerlerden kúder úzgen azamat sońǵy úmitin úkilep, byltyr Almatydaǵy Ortalyq klınıkalyq aýrýhanaǵa bas suǵypty. Mundaǵylar Erbolatqa arterıovenozdyq fıstýla, ıaǵnı bas-mı tamyrynyń patologıasy dıagnozyn qoıǵan. Hırýrgter óte sırek kezdesetin aýrýdy joıý úshin kúrdeli ota jasaýǵa bel býady. Bastaǵy isik mı tamyrlarymen astasqan eken. Sondyqtan dárigerler operasıany eki kezeńge bólip jasaǵan.

«Operasıanyń úlken asqynýlary bolýy múmkin edi, bir ret isteıtin bolsaq. Olqan ketý, joǵary qan joǵaltý, asqynýlary. Sol sebepten biz bul operasıany birneshe etapqa bólip istedik. Birinshi etappen isikke baratyn tamyrlardy jaýyp, odan keıin kelesi kelgen kezde ekinshi etappen sol isikti túgeldeı alyp tastadyq»,-dedi  Ortalyq klınıkalyq aýrýhananyń neırohırýrg dárigeri Marat Sarsheva. 

Sátti jasalǵan otadan aman shyǵyp, basyndaǵy múıizdeı isikten qutylǵan Erbolattyń qazir qýanyshy qoınyna syımaı júr. Al aq halattylar naýqastyń jaǵdaıyn ármen qaraı únemi baqylaýda ustaıtynyn jetkizdi.