Beli qyldyryqtaı bolsa da qumyrsqanyń ylǵı taýdaı júk arqalap júrgenin kóremiz. Bul bir kezdeısoqtyq pa, álde Táńirdiń pendesine taǵylym alsyn degeni me, áıteýir, qumyrsqa da, áıel zaty da bir ispetti. Tolstoıdyń «Anna Karenınasy» jazylǵannan bastap kúni búginge deıin qanshama tilde, qansha elde, qanshama týyndy túrinde álemdi sharlaǵanyn eskersek, bizdiń de sol ýaqyttan beri bir ǵana áıel taǵdyryn arqaý ete otyryp, kóp nárseni jetkizbegenimizge tańǵalýǵa bolady. Tarıhymyzǵa úńilsek, el basyna kún týǵanda etigimen sý keship ketken er ataýlynyń artynda qalyp, oshaǵynyń otyn, azamatynyń atyn óshirmeı, aýyr qıyndyq pen qylburaý qıanatty qasqaıa qarsy alǵan qazaq áıelderi jeterlik, al solardyń ishinde Fatıma Ǵabıtovanyń jóni tym bólek. Sebebi ol – bir emes, úsh birdeı ultymyzdyń uly tulǵasynyń urpaǵyn ósirip, muralaryn saqtap qalǵan asyltekti áıel, altyn qursaq ana. Úsheýdiń biri – Alashtyń ardaqty uly, kezinde elimizdiń bilim salasyna bilikti basshylyq jasaǵan Bilál Súleev, ekinshisi qazaqtyń qulager aqyny İlıas Jansúgirov bolsa, endi biri – uly Muqań, Muhtar Áýezov. Bilál Súleev, İlıas Jansúgirov, Muhtar Áýezov jáne Fa­tıma men balalary tóńireginde órbı otyryp, qazaqtyń HH ǵasyr boıyna bastan keshken zobalańdaryn qamtyǵan «Fatıma» qasiretnamasynyń bir ǵana túıini sondaǵy ke­ıipkerdiń, jańylyspasaq, Muhtar Áýezovtiń aýzymen aıtylǵan myna sózge syıǵandaı: «Qazaqtaǵy bul qaıǵy: jylqydaǵy – jamanat, sıyrdaǵy – qorasan, qoıǵa tıgen jut boldy». Alaıda avtor menen rejıserdiń sheshimi bizge unady, ıaǵnı qys artynan kóktem keletin tirshilik zańyna sáıkes, sondaı zulmattyń sońynda Fatıma bolashaqtyń ıesi – ba­lalarymen gúlge kómkeriledi.. Avtor: Márıam ÁBSATTAR http://alashainasy.kz