«I am a singer Kazakhstan» halyqaralyq talant shoýynyń ekinshi maýsymy bastaldy. Osyǵan oraı Qazaqstan baspasóz klýbynda baspasóz otyrysy ótti. Oǵan "31-arna" bas dırektory Baǵdat Qojahmetov pen «I am a singer Kazakhstan» shoýynyń sarapshysy, ánshi Sáken Maıǵazıev qatysty, dep habarlaıdy Qamshy.kz aqparat agenttigi. 

Konferensıada sóz alǵan Baǵdat Bolatjanuly bıylǵy «I am a singer Kazakhstan» shoýynyń birinshi maýsymnan aıyrmashylyǵyn atap ótti. Onyń aıtýynsha, bıylǵy jobaǵa talanty bar kez kelgen salanyń ókili Qazaqstan men álemniń túkpir-túkpirinen kelip qatysa alady.

Bıylǵy jobaǵa Grýzıa, Túrkıa jáne Úndistannyń ónerpazdary qatysýǵa nıet bildirdi. "31-arna" bas dırektorynyń aıtýynsha, Qytaıda «I am a singer Kazakhstan» jobasyna erekshe qyzyǵýshylyq tanytyp otyr. Baǵdat Qojahmetovtyń bergen málimetine sáıkes, byltyr Qytaıda "I am a singer Kazakhstan" shoýynyń birinshi maýsymyn 150 mıllıon adam tamashalaǵan. Oǵan qazaqstandyq ánshi Dımash Qudaıbergenniń Qytaıdaǵy bedeli men tanymaldylyǵy áser etkenin aıtady.

- Birinshi maýsymda "sheteldik ánshiler baıqaýǵa qatysý úshin sol eldiń ulttyq telearnasy shoýdy kórsetý qajet" degen shart bolatyn. Byltyr bul shartty alyp tastadyq. Sebebi "I am a singer Kazakhstan" baıqaýyna Qazaqstanda da, shetelde de qyzyǵýshylyq zor ekenine kózimiz jetti. Ásirese, Qytaıda. Oǵan Dımashtyń áseri joq emes. Qytaılyqtar Qazaqstanda 18 mıllıon Dımash turady oılasa kerek, - deıdi "31-arna" bas dırektory.

"I am a singer Kazakhstan" halyqaralyq talant shoýynyń ekinshi maýsymynyń taǵy bir erekshiligi - bıyl jobany birden eki telearna kórsetedi. Shoýdyń ózin "31-arnadan" tamashalap, onyń kúndeligin «Muzzone» telearnasynan kóre alasyzdar.  

Atalmysh jobaǵa birden eki telearnanyń efır ýaqyty berilgeni beker emes. Byltyrǵy shoý halyq arasynda úlken suranysqa ıe bolyp, kórermen súıispenshiligine bólengen. Oǵan joǵary reıtıń dálel.

Byltyr "I am a singer Kazakhstan" halyqaralyq talant shoýy álemniń 6 elinde taralyp, 8 eldiń telearnasynda kórsetilgen. Shoýdy 200 mıllıonnan asa adam tamashalaǵan.

- "I am a singer Kazakhstan" shoýynyń qamtyǵan aýmaǵy men aýqymy keń, uıymdastyrylý deńgeıi joǵary, sapasyna qoıylǵan talap joǵary boldy. Qazaqstandyq naryqtyń aldyna bıik belesti belgilep berdi. Reıtıń kórsetip otyrǵandaı, shoý kórermenniń de, uıymdastyrýshylardyń da kóńilinen shyqty, - deıdi Baǵdat Bolatjanuly.

Qatysýshylardyń talantyn baǵalaıtyn sarapshy Sáken Maıǵazıev ýaqyttyń tyǵyzdyǵyna qaramastan «I am a singer Kazakhstan» shoýynda sarapshy bolýǵa qýana keliskenin aıtady.

- Maǵan osyndaı usynys kelgende qýandym. Sebebi "I am a singer Kazakhstan" shoýy maǵan qatty unaıdy. Shoýǵa qatysqan Qaırat, Erden, Jarqynaı jáne basqa da barlyq qatysýshylar ózderiniń barlyq múmkindigin ashyp, kásibı deńgeıin kórsete bildi. Qansha talant tasada qalyp qoıyp jatyr. Osy joba naǵyz talanttarǵa ónerin pash etýge keremet múmkindik berip otyr, - dedi Sáken Maıǵazıev.

Ánshiniń bulaı deýine negiz de joq emes. Ekinshi maýsymda júldeli 3 orynǵa ıe bolǵandar salmaqty syılyqtardy ıelenedi. Bıylǵy shoýdyń júlde qory – 50 000 000 mıllıon teńge.

- 50 000 000 mıllıon teńge birinshi, ekinshi jáne úshinshi oryn arasynda úlestiriledi. Bas jeńimpaz Almatyda jeke konsertin ótkizip, jańa ánin jazyp, beınebaıan túsirýge jáne ony qazaqstandyq radıostansıalarda, mýzykalyq telearnalarda jyl boıy rotasıalaýǵa múmkindik alady, - dedi Baǵdat Bolatjanuly.

Shoýdyń ekinshi maýsymynda 4 sarapshy bolady. Onyń úsheýi turaqty bolsa, tórtinshisi táýelsiz, ıaǵnı aýysyp otyrady. Shoý uıymdastyrýshylary ázirge ánshilerdiń ónerin baǵalaıtyn basqa da sarapshylardyń esimin atamaı otyr. Bul kórermen úshin jaǵymdy tosynsyı bolmaq. Qysqasy, ekinshi maýsymda kórermendi kóptegen qyzyq kútip tur.

"I am a singer Kazakhstan" halyqaralyq talant shoýynyń ekinshi maýsymynda zalda otyrǵan kórermen úmitkerlerge daýys bere alady. Ol úshin arnaıy qurylǵy ornatylady. Eger jobaǵa qatysýshynyń óneri zaldaǵy kórermenniń 50 paıyzyna unasa, qazylar alqasy da onyń shyǵarmashylyǵyn baǵalaı alady.

Jobaǵa qatysý úshin ótinimderdi qabyldaý bastaldy. Ol 2018 jyldyń 28 shildesine deıin jalǵasady. Ótinim berý úshin singer.31.kz saıtyndaǵy saýalnamany toltyrý qajet. Sonymen qatar úmitkerdiń fotosy men vıdeo qosa jiberiledi. Qatysýshynyń jasy 16-dan tómen bolmaýy tıis.