Serikbaı qajy Oraz Reseı musylmandary dinı basqarmasynyń tóraǵasy Ravıl Gaınýtdınniń resmı shaqyrýymen Máskeý qalasyna bardy, dep habarlaıdy Qamshy.kz aqparat agenttigi QMDB baspasóz qyzmetine silteme jasap.

Bas múftı qaladaǵy «Don» qorymyn zıarat etip, kórnekti qoǵam jáne memleket qaıratkeri, ult maqtanyshy Álıhan Bókeıhan men Nyǵmet Nurmaqulynyń rýhyna Quran baǵyshtap, duǵa jasady.

Qorymdy zıarat etý rásimine Máskeýde oqyp jatqan qazaq jastary da qatysty. Olarǵa nasıhat aıtqan Bas múftı: «Halqymyzdyń basynan talaı náýbetti zamandar ótti. Ult qamyn qaraqan basynyń múddesinen joǵary qoıa bilgen keshegi Alash arystary elimiz ben jerimizdiń erteńi úshin ózin qurban etti, sheıit boldy. Alla Taǵala el úshin opat bolǵan babalarymyzdy óz raqymyna bólegeı. Olardyń kúreske toly ómiri urpaq úshin qashan da óshpes ónege bolyp qala beredi. Allaǵa shúkir, olar kóre almaı ketken táýelsizdikti biz kórip otyrmyz. Qudaıǵa shúkir, táýelsizdik jolynda sheıit bolǵandardyń arman-tilegi oryndaldy. Endeshe, búgingi egemen eldiń jastary úshin namys, bilimge qushtarlyq, ımandylyq syndy minez ben asyl sıpattar kerek. Búgingi beıbit zamannyń kúresker azamattary osyndaı bolýy qajet», – dedi.

QMDB tóraǵasy zıratty zıarat etkennen keıin Máskeýde oqyp jatqan qazaq jastarymen suhbattasyp, emen-jarqyn áńgimelesti.