Ońtústik Qazaqstan oblysy Maqtaral aýdanynyń ákimi jıý-jıtsý boıynsha álem kýbogynda kúmis júldeger atanǵan Tólegen Atkýlovty qabyldady.
Jaqynda ǵana Panama Respýblıkasynyń astanasy Panama qalasynda ótken sporttyń jıý-jıtsý túrinen álem kýbogynda kúmis júldeger atanǵan Tólegen Atakýlov aýdan ákimi Jamantaı Beısenbaevtyń jeke qabyldaýynda boldy. Sportshymen jeke júzdesken aýdan basshysy ony jetistigimen quttyqtap, arnaıy marapattady.
"Maqtaraldan shyǵyp elimizdiń atyn álemge tanytyp jatqan sen sıaqty sportshylarymyz kóp bolsyn. Aldaǵy ýaqytta budan da bıik shyńdardy baǵyndyrýyńa tilektespin!" - dep aýdan basshysy izgi tilegin aıtty.
Tólegen Atakýlov 1992 jyly Maqtaral aýdanynda týylǵan. 2011 jyly Almaty qalasyndaǵy Respýblıkalyq mamandandyrylǵan sport mektebine oqýǵa túsip, 2014 jyly aıaqtady.
2015 jyldan bastap sporttyń jıý-jıtsý túrimen aınalysyp, Qazaqstan Respýblıkasynyń birneshe dúrkin chempıony atanady. Sondaı-aq, 2016 jyly erejesiz jekpe-jekten "Alash praıd" dodasynyń jeńimpazy bolǵan.
Aıta keteıik, jaqynda ǵana Panama Respýblıkasynyń astanasy Panama qalasynda ótken jıý-jıtsý boıynsha Álem kýbogynda Tólegen Ataýlov kúmis júldeger atanyp, elimizdiń abyroıyn asqaqtatty.
