OQO ákimi Janseıit Túımebaev pen Shymkent qalasynyń ákimi Nurlan Saýranbaevtyń qala turǵyndaryna arnalǵan úndeýi jarıalandy, dep habarlaıdy Qamshy.kz aqparat agenttigi. 

"Qurmetti Shymkent qalasynyń turǵyndary! Shymkent qalasy Qazaqstannyń úshinshi  megapolısi atandy. Sizderdi osynaý tarıhı mańyzdy oqıǵamen quttyqtaımyz!Jýyrda Memleket basshysy óz sózinde «Qazaqstan aglomerasıany damytý strategıasyn júzege asyrýdy bastady. Eger bizde buǵan deıin mıllıon turǵyny bar tek Almaty qalasy bolsa, qazir úsh megapolısimiz bar – Almaty, Astana jáne Shymkent qalalary",-delingen habarlamada.

"Mıllıondy qala – bul árdaıym jańa ıdeıalar, jobalar men josparlar, aýqymdy ınvestısıalar. Barlyǵy qalanyń damýyna jańa serpin beredi. Shymkent bul mártebeli deńgeıge ǵasyrlar boıy jetti. Bizdi alda úlken ózgerister kútip tur. Eń bastysy - bul jańalyq Shymkent qalasyn odan ári damytýǵa jańa múmkindikter týǵyzyp, árbir qalalyqtyń ómirine jańa serpin beredi, oń áserin tıgizedi dep senemiz. Bul – sonymen qatar, biz úshin asqan jaýapkershilik", - dep jazylǵan úndeýde.

Sonymen qatar, habarlamada ákimder Shymkenttiń keleshekte úlgili qalaǵa aınalaryna senim bildirgen.

"Memleket basshysy mundaı qalalar turǵyndar úshin qolaıly, qaýipsiz, turǵyn úı-kommýnaldy sharýashylyǵy jańartylǵan jáne mádenıeti joǵary bolýy tıis dep kórsetti.Shymkent sondaı qalaǵa aınalady dep senemiz. Sebebi bizdiń qalamyzda qonaqjaı, qaıyrymdy, eń bastysy, eńbekqor halyq turady. Biz bárimiz birge Shymkentti Elbasy kútkendeı «aqyldy», «jasyl» ári qaýipsiz qalaǵa aınaldyramyz dep senemiz. Shymkent jańa ıdeıalar halqymyzdyń dástúrimen qatar damyp, ótkenin umytpaıtyn, sonymen qosa jańa tehnologıalarǵa umtylatyn turǵyndar qalasyna aınalady. Shymkent qalasynyń barlyq turǵynyn osynaý tarıhı sátpen quttyqtaımyz! Barshańyzǵa baqyt pen molshylyq tileımiz!". - dep aıtylǵan úndeýde.