Ýaǵaleıkým ássálám! Qurmetti suraq suraýshy, «8 naýryz meıramymen quttyqtaý kúná ma» dep tursańyz, onyń kúnási joq. Adamǵa jaqsy tilek bildirgeni úshin kúnáǵa batyp, tozaqqa kiredi dep aıta almaımyz. "8 naýryz" sharıǵı bir meıram emes ekendigi barshaǵa málim. Ol qoǵamymyzda oryn alǵan qubylystardyń biri. Sharıǵatta áıel adamyna degen qurmettiń qanshalyqty ekenin aıtpasaq ta belgili. Musylmandar ár kúni áıel kisilerge qurmetpen qaraýlary tıis. Áıtse de, árbir qoǵamda asa mańyzdy dep bilgen nárselerdi erekshelendirip, olarǵa arnaıy bir kún arnap jatady. Mysaly, bizdiń elde «Tuńǵysh Prezıdent kúni», «Balalardy qorǵaý kúni», «Respýblıka kúni»,«Konstıtýsıa kúni» t.b. ataýly kúnder bar. Mundaǵy maqsat - olardyń mańyzdylyǵyna, qoǵamdaǵy aıryqsha mártebesine, qundylyǵyna nazar aýdartý bolsa kerek. Sol sıaqty, ómirimizde ózgeshe orny bar analarymyzǵa da bir kúndi arnap, sol kúndi atap ótip jatsa, onyń eshbir aǵattyǵy joq. Taǵy da qaıtalap ótelik, 8 naýryz meıramy sharıǵı bir meıram emes. Quttyqtaýǵa eshkim mindettelmeıdi. Biraq, qoǵamymyzda orny bar aıryqsha kún retinde áldebir musylman kisi anasyn nemese jaryn ıakı áriptesin, ustazyn (sharıǵat sheńberinde) quttyqtap jatsa, oǵan bola kúnáǵa batady dep aıtý qıyn. Atalmysh meıramnyń shyǵý tarıhy jaıynda túrli derekter kezdesedi. Degenmen, tek qana shyqqan tarıhyna qarap, keı dúnıelerdi haramǵa shyǵarý qate tásil. Olaı bolsa, 22 naýryz meıramymen quttyqtaýdyń úkimi ne bolmaq?! Naýryz meıramynyń shyǵý tarıhy Islamǵa deıingi ýaqytqa týra keledi. Bul meıram "otqa tabynýshylardan" nemese "shamanızm" senimindegilerden bastaý alýy múmkin. Alaıda, qazirgi tańda atalyp ótý maqsaty múldem ózgergen. Buryńǵy senim-nanym belgileri joıylyp, qur dástúrli meıram retinde qalyptasty. Sol sebepti, Naýryz meıramyn toılaý - sharıǵatqa qaıshy emes deımiz. 8 naýryz áıelder kúni meıramynyń búgińgi qoǵamymyzdaǵy hali de dál solaı. Fıqhta "Haram degen úkimge ıtermelegen sebeptin joıylýy nátıjesinde, onyń haram úkimi de joıylady" deıtin maǵynada qaǵıda bar. Eń durysy – Allaǵa málim!