Elbasy Qytaımen yntymaqtastyqtyń keleshegine zor senimmen qaraıdy. Bul týraly Nursultan Nazarbaev Qytaıda BAQ ókilderimen ótken brıfıń barysynda aıtty.

– Ótken kelissózderdiń nátıjesinde Qytaı tarapy bizdiń delegasıaǵa úlken senimmen qaraıtynyn aıtty. Men osymen Qytaıdyń tórtinshi tóraǵasymen jumys istep otyrmyn. Alǵashqy tóraǵamen biz shıelenisip turǵan shekara máselesin talqyladyq. Ekinshisimen ekonomıkalyq máseleni sóz ettik. Al Shı jın pıńmen ózara senimdi nyǵaıtý máselesine mán berdik. Memleketter arasynda sheshilmegen másele qalǵan joq. Osy ýaqytqa deıin 51 jobamen kelistik. Indýstrıalyq ınovasıalyq jobany júzege asyryp jatyrmyz. 1200 kásip saldyq. Bizdiń mindet shıki resýrstardan táýelsiz álternatıvtik ekonomıka qurý. Búignde munaı-gazdyń baǵasy 30 dollarǵa deıin tómendedi. Metal baǵasy da tústi, sol sebepti bizge qıyn. Bizdegi resýrstarǵa senip qalýǵa bolmaıdy, álemdegi ekonomıkanyń týrbýlenttiligi bárimizge belgili. Búgin munaıdyń baǵasy jaqsy bolsa, erteń dál sondaı jaqsy bolatynyna eshkim kepildik bere almaıdy. Sol sebepti alǵa qaraı qalaı jyljýǵa bolady, tabysqa jetý úshin ne isteý kerek, ekonomıka qandaı jaǵdaıda ósedi – osy suraqtardyń jaýabyn izdestirgen jón», - dedi Elbasy Sındaoda ótken brıfıń barysynda.

Buǵan qosa Elbasy QHR-men yntymaqtastyqtyń avtomobıl óndirisin damytýǵa septigin tıgizetinin málimdedi.

–Eger ekonomıka jyl saıyn kóterilmese, bizdiń jańa zaýyttar men kásiporyndaryn salatyn múmkindigimiz bolmaıdy, ondaıda adamdardyń qajettiligin qamtamasyz ete almaımyz. Sol sebepti 51 jobanyń tórteýi iske qosyldy, altysy bıyl qosylady. 18-in aldaǵy jyly qosamyz. Bul nysandar usaq bolyp kóringenimen, mańyzy zor. Máselen, sement zaýyty nemese Qostanaıdaǵy avtomobıl zaýyty. Sapar aıasynda Allúr zaýytyna qytaılyq kapıtal 49 paıyzben kirip, 1,1 mlrd dollar ınvestısıa quıady dep kelisildi. Avtomobıl óndirisi 100 myń danaǵa jetedi. Osymen bitpeıdi. Men barlyq bólshekter elimizde shyǵarylýy tıistigin aıttym. Demek, munyń barlyǵy da bizdiń kásiporyndarda jasalady, - dedi Elbasy.