Almatyda 12 maýsym kúni ondaǵan adam qonaqúıde baspasóz máslıhatyn ótkizip, "Qytaı úkimetiniń ózderine zeınetaqysyn tóleýdi toqtatqanyna" taǵy da narazylyq bildirdi dep habarlaıdy Azattyq.

Jıyndy uıymdastyrǵan "Ata jurt" uıymy ókilderiniń aıtýynsha, Qytaıdan zeınetaqysyn ala almaı júrgen júzden astam adam bar. Kóbi Qazaqstannyń ár óńirinde turatyndyqtan búgingi jıynǵa kele almaǵan.

Jınalǵandar ózderiniń Qytaıda zeınetkerlikke shyǵyp, Qazaqstanǵa qonys aýdarǵan soń zeınetaqylaryn alyp júrgenin, al byltyrdan bastap zeınetaqylaryn tóleý toqtatylǵanyn aıtady. Olardyń aıtýynsha, Qytaı zańy boıynsha, Qytaıda zeınetke shyqqan adamǵa ol shetel azamattyǵyn alsa da zeınetaqysy tólene beredi.

Narazylar Qytaıdyń ózderine zeınetaqy tóleýdi ne sebepti toqtatqanyn eshkim túsindirmegenin aıtady.

Mahat Nadıa esimdi zeınetkerdiń aıtýynsha, byltyrǵy jyldyń basynda Qytaı úkimeti ózine yqtıar hattyń kúshin joıyp, qaıtadan kelýin talap etkenin aıtty.

— Balalarym Qazaqstan azamattary. Sony aıtyp, Qytaıǵa bara almaımyn dep edim, olar zeınetaqymdy toqtatyp tastady, - dedi Mahat Nadıa.

Serikjan Bilásh esimdi belsendi jınalǵandar Qytaı úkimetinen "zańdy zeınetaqysyn" tóleýdi talap etetinin, eger ózderine resmı jaýap bermese, halyqaralyq sotqa júginýge májbúr bolatyndaryn málimdedi.

Zeınetkerler jıynnan soń Qytaıdyń Almatydaǵy konsýldyǵyna talap-aryzdary jazylǵan hat tapsyrmaqqa bardy. Konsýldyq ókilderi qazir olardy qabyldaı almaıtynyn aıtyp, tústen keıin kelýdi surady.

Aqpannyń 5-i kúni ondaǵan adam Almatydaǵy Qytaı konsýldyǵyna Qytaı úkimetinen zańdy zeınetaqysyn tóleýdi talap etip, hat tapsyrǵan. Búgin jınalǵan top ol hattaryna áli jaýap ala almaǵanyn aıtady.