Almaty qalasynyń ákimi Baýyrjan Baıbek Reseı Federasıasynyń Qazaqstandaǵy tótenshe jáne ókiletti elshisi Alekseı Borodavkınmen kezdesti, dep habarlaıdy Qamshy.kz aqparat agenttigi. 

Taraptar saýda-ekonomıkalyq, mádenı-gýmanıtarlyq baılanystardy nyǵaıtý máselelerin talqylady.

Reseı dástúrli túrde Qazaqstannyń negizgi ekonomıkalyq áriptesteriniń biri sanalady. Almaty men kórshi el arasyndaǵy taýar aınalymy turaqty damýdy kórsetip keledi. Ótken jyldyń ózinde kórsetkish 22% -ǵa ósken. Búgingi tańda Almaty qalasynyń ákimdigi men Máskeý, Sankt-Peterbýrg jáne Qazan qalalarynyń merleri arasynda birqatar baǵyttar boıynsha yntymaqtastyq týraly kelisim bar.

Qalada saýda, qarjy, medısına, ındýstrıa jáne t.b. salalarynda reseılik kapıtaldyń qatysýymen eki myńnan astam kásiporyn jumys isteıdi. Alataý aýdanynyń ındýstrıaldy aýmaǵynda «KMK Invest» reseılik zaýytynyń kabeldi jáne sym ónimderin óndirý boıynsha qurylysy júrip jatyr.

Kezdesý barysynda Reseı elshisi prezıdentter men eki el halyqtarynyń arasyndaǵy jyly jáne senimdi qarym-qatynastyń árdaıym bolatyndyǵyna toqtaldy.

«Búgingi kúni EAEO aıasynda birqatar birlesken jobalar júzege asyrylýda. Sonymen birge, ekijaqty týrızmdi damytý men bilim berý baǵdarlamalaryn keńeıtýdiń úlken áleýeti bar. Ortalyq Azıa óńirindegi eń iri qala retinde Almatyda túrli halyqaralyq forýmdar, konferensıalar men festıváldar uıymdastyrylady, onda Reseıden kelgen delegasıalar  qatysady. Birneshe kún buryn UQSHU Syrtqy ister mınıstrler samıti jáne Eýrazıalyq medıa forým ótti. Osynyń bári bizdiń elderimiz arasyndaǵy mádenı jáne iskerlik baılanystardy odan ári damytýǵa yqpal etedi », - dedi Alekseı Borodavkın.