20-maýsym kúni maqtaraldyq túlekterdiń alǵashqy legi Ulttyq birińǵaı testleýden ótedi. Ol úshin túlekterdi UBT ótetin nysanǵa tasıtyn arnaıy kólikter daıyn tur. Sondaı-aq, medısınalyq járdem men órt sóndirýshi kólikter bekitilip, kirip-shyqqan kólikterdi retteý úshin ishki ister basqarmasynyń qyzmetkerleri jumys isteıtin bolady. Búgin bul týraly aýdan ákimi Jamantaı Beısenbaev Astana qalasynan kelgen arnaıy komısıa quramymen ótken otyrysta málim etti.

Jıyndy júrgizgen aýdan basshysy J.Beısenbaev komısıa múshelerimen naýqan kezinde oryn alýy múmkin máselelerdiń aldyn alý boıynsha pikir almasty. Aýdandyq ulttyq qaýipsizdik komıteti, aýdandyq ishki ister basqarmasy, aýdandyq ortalyq aýrýhana men tótenshe jaǵdaılar bóliminen bekitilgen arnaıy qyzmetkerlerge óńir basshysy tapsyrma berip, ózderine júktelgen mindetterdi barynsha uqyptylyqpen oryndaýǵa shaqyrdy.    

UBT ótetin №119 mekteptegi aýdıtorıalardy aralap kórgen aýdan basshysy men komısıa músheleri oqýshylardyń synaq tapsyrýyna barlyq jaǵdaı jasalǵanyna kýá boldy. Atap aıtqanda, aýdıtorıalarda túgeldeı jeldetkishter ornatylyp,  aýyz sý, ájethana máselesi sheshilip, elektr jaryǵymen qamatamasyz etý úshin qosymsha transformator daıyndalǵan.

Ulttyq birińǵaı testleý kúni 30 uıaly telefon sıgnalyn anyqtaıtyn jáne 2 metal anyqtaıtyn qurylǵylar paıdalanylady. Sonymen qatar, oqýshylar men ata-analardyń qaýipsizdigi úshin 22 beınebaqylaý kameralary iske qosylǵan.  

"Qurmetti komısıa músheleri! Ózderińiz kórgendeı, aýdıtorıalarda barlyq tehnıkalyq talaptar saqtalǵan. Balalardy 2 ret tamaqtandyratyn asqanamyzdyń sanıtarıalyq tazalyǵy qatań tekserilip, synaqtan ótýshilerge barlyq jaǵdaıdy jasap otyrmyz. Endeshe, nysandy ózderińizge tapsyramyn" - dedi Jamantaı Qanaıuly.

Aıta keteıik, bıyl Maqtaral aýdanynda 2807 oqýshy 4 lekpen Ulttyq birińǵaı testleýden ótedi.