Shekarany zańsyz kesip ótti degen aıyppen búginde Taldyqorǵan qalasyndaǵy tergeý ızolátorynda otyrǵan etnıkalyq qazaq Saıragúl Saýytbaı Qazaqstan Respýblıkasynyń prezıdenti Nursultan Nazarbaevqa hat jazdy. Saıragúldiń hatyn jýrnalıs Sáýle Ábedınova Facebook-tegi paraqshasynda jarıalady. Tóte jazýmen jazylǵan hattyń qazaqshaǵa aýdarylǵan nusqasy tómendegideı:
Qazaqstan Respýblıkasynyń Prezıdenti
Nursultan Ábishuly Nazarbaevqa
Taldyqorǵan qalasy
LA 155116 mekemesindegi qamaýdaǵy SAÝYTBAI SAIRAGÚLDEN
ÓTİNİSH HAT
QURMETTİ NURSULTAN ÁBİSHULY!
Men, Saýytbaı Saıragúl 05.04. 2018jyly Qazaqstan-Qytaı shekarasyn zańsyz óttim. Bul zańsyz áreketimniń basty maqsaty – otbasymmen qaýyshý, beıbit ómir keshý.
2016jyldan beri eki balammen joldasym , Qazaqstannyń tolyqqandy azamaty boldy. Al men Qytaıda memlekettik qyzmette bolǵandyqtan Qazaqstanǵa ketýge úzildi-kesildi tyıym salyndy. Ondaǵy másele, meniń memlekettik qyzmetker retinde mańyzdy jınalystarǵa qatysyp, Qytaıdyń ishki saıasatyndaǵy dúnıeni Qazaqstanǵa jarıa etedi degen qorqynysh . Dál qazirgi ýaqytta qytaıdaǵy qazaǵymnyń jaǵdaıy óte aýyr, adam sengisiz jaǵdaıdy bastan keshirip jatqandyǵyn Sizge Elbasy retinde jetkizgim keledi. Búgingi tańda qytaıda qazaq halqyn túpkilikti joıý saıasaty júrgizilýde . Shirkin, osy qatygez saıasatqa tosqaýyl bola alsaq qoı!
Ulty qazaq ataýlynyń barlyq jeke bas qujattary zańsyz tárkilenip, " saıası lager" atty laqap atanǵan , shyn máninde túrmege jabylyp, ushty-kúıli joq bolýda. Qujatsyz adamdy tabý múldem múmkin emes ekendigi barshamyzǵa aıan!
Sol kópshiliktiń ishinde , meniń de qujattarymdy tartyp alǵandyqtan, qalaıda bala-shaǵama jetip alýdy jón kórdim.
Atamekenimde bul zańsyz áreketim úshin jaýapqa tartylýǵa daıynmyn.
Qurmetti Elbasy!
Sizden ótinerim maǵan ul-qyzymmen, joldasymmen qosylyp tolyqqandy otbasy bolýǵa múmkindik berýińizdi suraımyn!
Maǵan Qazaqstannyń azamattyǵyn berýińizdi suraımyn, bul - meniń eń basty armanym, sebebi, meniń ultym - qazaq.
QURMETPEN , S.SAÝYTBAI.
20.06. 2018J
Bıyl sáýirdiń ortasynda Qazaqstanǵa ótken Saıragúldi mamyrdyń 22-si keshke 21.00-21.30-dar shamasynda shekara qyzmetkerleri, úıinde otyrǵan jerinen ustap áketken. Sebebi áıel Qazaqstan shekarasynan qujatsyz ótken. Al áıeliniń qujatsyz qalaı ótkeninen joldasy Ýálı Silám habarsyz edi. Alǵashynda Jarkenttiń ýaqytsha tergeý ızolátorynda otyrdy. Bir-eki apta buryn Taldyqorǵan ýaqytsha tergeý ızolátoryna aýystyrdy.
