QR Mádenıet jáne sport mınıstri Arystanbek Muhamedıuly Gennadıı Golovkınniń jekpe-jegin Qazaqstanda ótkizý jaıly pikir bildirdi.

Budan buryn Nursultan Nazarbaev Golovkınmen kezdesken. Kezdesý barysynda bokstan álem chempıony Gennadıı Golovkın Prezıdentke óziniń chempıondyq belbeýin syıǵa tartty.

«Bul kezdesýde men de boldym. Biz Memleket basshysynyń tapsyrmasymen Gennadıı Golovkınniń jekpe-jegin Qazaqstanda ótkizý máselesin talqyladyq. Qazirgi ýaqytta Reseıde fýtboldan álem chempıonaty ótip jatyr, ózge memleketter chempıonatty ótkizýde kezekte tur. Al Golovkınniń jekpe-jegine álem qyzyǵady», - dedi Arystanbek Muhamedıuly Ortalyq komýnıkasıalar qyzmetiniń baspasóz máslıhatynda.

Muhamedıulynyń aıtýynsha, bul másele aldaǵy ýaqytta boksshynyń menedjerlerimen talqylanatyn bolady.