Almaty qalasyndaǵy  № 45 kitaphanada «El-shejire» qoǵamdyq qory Almaty qalasy İshki saıasat basqarmasymen birlese otyryp, QR Ulttyq memlekettik Kitap palatasynyń dırektory Álibek Asqarovpen kezdesý ótkizdi. Jıyn Astananyń 20 jyldyǵyna oraı uıymdastyryldy.

Kezdesýdiń basty maqsaty – Astananyń elimizdiń damýyna qosqan úlesi men atqarylǵan isterin barlyq býyn ókilderine tyńǵylyqty túsindirý.

Tyń ıdeıalardy, jańa ǵylymı sheshimder men sáýlet óneriniń ozyq úlgilerin ómirge ákelgen Astananyń 20 jyldyǵy halyqaralyq deńgeıdegi aıtýly oqıǵa. Osy oraıda Álibek Asqarov jas qalanyń eki on jyldyqtaǵy qalyptasý jáne qaryshty damý kezeńi haqyndaǵy oı-tolǵanysyn ortaǵa saldy. Sondaı-aq, birlik pen kelisimniń jalpy ulttyq úlgisi bola alǵandyǵyn, búginde halqy bir mıllıonnan asatyn alyp qalaǵa aınalǵandyǵyn áńgimege arqaý etti. Ol «Qazaqstannyń qazirgi zamanǵa laıyq jańa astanasyn salý ıdeıasy Memleket basshysy Nursultan Nazarbaevqa tıesili ekeni málim. Elbasynyń osyndaı batyl qadamǵa barýyna túrli faktor sebep boldy. Eń bastysy elimizdiń ekonomıkalyq jáne geosaıası múddesine baılanysty edi. Astana el aýmaǵy ortasynda ornalasyp, Eýropa men Azıany jalǵastyratyn altyn kópir. Burynǵy men qazirgi qalany esh salystyrýǵa bolmaıdy. Elordany alyp qala etip qalyptastyrýǵa bir emes, birneshe jyldar ketti. Qomaqty qarjy quıylyp, kóp kúsh jumsaldy. Búginde Astana –jedel qarqynmen damyp kele jatqan zamanaýı qala. Ony búkil álem moıyndap otyr» -dedi.

Buǵan qosa, « Sol kezdiń ózinde úıler qymbattaý edi. 2-shilde kúni kóship bardyq. Qalanyń ishine kirgende «Biz qaıda keldik?Myna jerdi astana jasaǵansha qaı zaman?» -degen kúdik sanamyzda saırap turdy. Sol kúni aspan ashyq bolsa da, jyly jańbyr quıyp jaýdy. «Allanyń nury jaýdy»– dep  jaqsylyqqa baladyq. Al basqa mınıstrlikter men prezıdent ákimshiligi 10 jeltoqsanda 6 aıdy artqa tastap bizden keıin at basyn burdy. Osylaısha alǵash bizder kóship barǵan bolatynbyz. Mine búginde kúdigimiz seıilip, úkilegen úmitimiz aqtaldy. Shet eldermen terezemiz teńesip, asyǵymyz alshysynan tústi. 20 jyl burynǵa sheshimimizdiń durys bolǵanyna qazirgi ýaaqytta shúkirlik aıtamyz. Astana – Eýrazıanyń dál kindiginde ornalasqan ásem shaharlardyń biri ári biregeıi»- dep Álibek Asqarov óz sózin ádemi estelikterimen aıaqtady.