Ákejan Qajygeldın kelesi prezıdent saılaýyna qatyspaıtynyn aıtqan, dep habarlaıdy Qamshy.kz aqparat agenttigi. Bul týraly búgin «Jańa Qazaqstan» forýmynyń baspasóz máslıhaty barysynda saıasatker Dos Kóshim málimdedi.

– «Meniń úlken qatelikter jasaǵan kezim boldy» dep Qajygeldın óziniń ókinishin bildirdi. Men oǵan syılastyqpen qaradym. «Biz demokratıanyń týyn ustap ketetin adam emespiz. Jasym 65-ke  keldi. Osynda otyryp Qazaqstannyń  jaǵdaıyn jaqsartýǵa, Konstıtýsıany jańartýǵa, ózgertýge shamam kelgenshe kómekteseıin, biraq lıder bolmaımyn» dep ashyǵyn aıtty», - dedi Dos Kóshim Qajygeldınmen ońasha áńgimelesken sátin eske túsirip.

Dos Kóshimniń aıtýynsha, Ákejan Qajygeldın «Jańa Qazaqstannyń» bir múshesi bolyp qala bermek, alaıda elge qaıtar oıy joq.

Aıta keteıik, búgin "Jańa Qazaqstan" forýmy baspasóz máslıhatyn ótkizdi. Jıyn barysynda saıasatkerler Vashıngtonǵa saparlarynyń nátıjesin aıtyp, jýrnalıserdiń saýaldaryna jaýap berdi.