Fýdjeıra ámirliginiń bıznes delegasıasy Soltústik Qazaqstan oblysyna keldi. Delegasıany Fýdjeıra erkin ekonomıkalyq aımaǵynyń bas dırektory Sharıef Ál-Aýadhı bastap kelip otyr. Oblystyq ákimdikte SQO ákimi Fýdjeıra ámirliginiń bıznes delegasıasymen kezdesti. Kezdesýde eki jaqty áriptestik múmkindikteri talqylanyp, memorandýmdarǵa qol qoıyldy.

Kezdesýdi ashqan oblys ákimi Qumar Aqsaqalov qonaqtarǵa oblysymyzdyń saýda-ekonomıkalyq áleýeti týraly aıtyp berdi. Óńir basshysy teriskeı ekonomıkanyń birqatar salalarynda baılanysty nyǵaıtýǵa daıynbyz deıdi.

«Bizdiń oblys aýyl sharýashylyǵy ónimderin qaıta óńdeýge kóp kóńil bóledi. Soltústiktiń ónimi taza ári básekege qabiletti. Soltústik Qazaqstan ónerkásip, aýyl sharýashylyǵy, ónimdi eksporttaý jáne týrızm salalarynda birlese jumys jasaýǵa daıyn», - dedi Qumar Aqsaqalov.  

Fýdjeıra erkin ekonomıkalyq aımaǵynyń bas dırektory Sharıf Ál-Aýadhı qonaqjaılyq tanytqan soltústikqazaqstandyqtarǵa alǵysyn jetkizip, teriskeıge yntymaqtastyqty nyǵaıtý úshin kelgenderin aıtty.

«Bizde týrızm myqty damýda. Qonaq úı bıznesi salasynda tájirıbemen bólisýge daıynbyz. Biz treıdıng jáne ónimdi qaıta óńdeý baǵyttarynda qolaıly jaǵdaılar jasadyq. Biz seriktesterge salyq tólemeı, 100 paıyz úlesti ıelik etýge múmkindik beremiz. Soltústik Qazaqstanda bizdi ásirese týrızm jáne aýyl sharýashylyǵy salalary qatty qyzyqtyryp otyr. Jaz ýaqytynda sizderge kelip demalýǵa bolady, ol úshin aýa raıy óte qolaıly eken. Bizdiń elde qazir aptap ystyq. Sondaı-aq bizdiń bıznesmender saýda ortalyqtaryn salýǵa qyzyǵýshylyq tanytyp otyr», - dedi Sharıef Ál-Avadı.

Kezdesý sońynda eki tarap yntymaqtastyq jónindegi birqatar memorandýmdarǵa qol qoıdy.